DOOSPEL – Vastelaovendjveerders, waât hebbe vae, Prîns Bert I, Jeugdprîns Tom II en Jeugdprinses Yara op Doospel, bî-j de Vlikkestaekers, ‘ne geweldjige vastelaovendj moge belaeve. Det de vastelaovendj op Doospel laeftj bî-j groeët en klein det wiste vae al, mer det ’t zoeë schoeën is um in oos dörp veurop te gaon det haaje vae noeëts dörve droûme.
Vanaaf oos oetropinge tot aan Asgoonsdig waâs ‘t ein groeët fieëst. Met optraejes van Döbbel 3, Bjorn en Mieke en de Toddezek ging de vastelaovendj fantastisch van start en dit hebbe vae same doorgetrokke tot oos aaftakeling op deesdigaovendj. Deze vastelaovendj zulle vae as Prînsepaar vanne Vlikke en de Jóng Vlikke dan ouch noeëts vergaete.
Langs deze weeg wille vae gaer ‘n aantal minse bedânke di-j ‘n bî-jdrage hebbe gelevertj aan de vastelaovendj van 2019.
As Jeugdprîns Tom II en Jeugdprinses Yara wille vae gaer edereîn bedânke dae d’r met os twieë vastelaovendjsgekke ‘ne geweldjige vastelaovendj van heet gemaaktj! Ouch wille vae oos twieë adjudânte Manou en Stijn met de hieële Raod van Elf en de Vreêndje van de Raod bedânke vör de schoeëne tiêd.
En neet te vergaete Drej Kieër Niks di-j speciaal vör de Jóng Vlikke ‘n liedje hebbe gemaaktj. Met in ‘t bezundjer de commissie vör alles waât die vör os gedaon hebbe. En neteurlik alle aojers van de Jóng Vlikke!!
As Prîns Bert I wil ich Vorst Eric, veurzitter Mourk en de hieële Raod van Elf en aanhang bedânke vör deze geweldjige tiêd, dae vae same hebbe moge mej make. Ouch wil ich mien groentjes Joost en Nikee speciaal bedânke vör heure hûlp, advies en taxi service. Dao naeve wil ich ouch oos pap en mam en de rest vanne femilie bedânke det ze d’r altiêd en overal bî-j wore. En as leste wil ich miêne vreêndjegroep vanne Krattefuif bedânke want same met zoeë ‘ne groeëte groep hebbe vae d’r ‘n onvergaetelik fieëst van gemaaktj!
Dao naeve wille vae same Oze Hoempa , schlagerzangers Dao Geuns, ‘t optochtcomité en alle optochtdaelnemers, oos zöstervereiniginge en alle vastelaovendjveerders bedânke vör deze schoeëne tiêd dae vae noeëts mieër zulle vergaete. ‘t Waâs alle daâg ein groeët fieëst met dees twieë vastelaovendjsgekke en dae van Bieële Zjang!!!
Bedânktj! Bedânktj! Bedânktj!
Prîns Bert I
Jeugdprîns Tom II – Jeugdprinses Yara
