Di-j bestaon beej de grasie van ’t onbenûl waat vae zèllef hebbe van hoêzer koupe of verkoupe. Ajje uch de moôte dootj um eur koeëj zèllef aanne mân te brînge, kân det wat langer doore, mer asj löktj schiltj ’t uch gaw e paar doêzendj euroos.  En dao kujje dèk vör aanne stamtaofel zitte, of eur vraw ’n bleumke mejbrînge wil ich mer zegke. Mer dao rietj dae makelaar waal ziêne Lamborghini van. Detj börsj!

En braektj mich de moel neet oeëpe oeëver onreûrendjgoodmagnate. Ontreûrendj triest dék. Oongertösse det di-j met eure kedee êrreges aan ‘t ein of ânger strând zich ligke te koêtele, prebieëre de heûrders met eur AOWtje en smaal pensjoentje de heûrpenninge op ’t aete te spare. Of de neringdoondje heurder (gein weênkelketting!) dae  prebieërtj aan ziên fajiessemênt te ontkaome met 12 oor poejakke eederen daag. Kloeëtj d’r mer mej aan, zegke ze dan.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 95: Wi-j zoeë: Vêrrekes (met hoeëfdletter)? verscheen eerst op MLA Stories.

Woeërum reezje dan nog mej? Vör di-j zûllevere of broônze medalie di-jje in eur nachkèsjeslaaj kuntj legke en wieter gein kloeëte waerd es? Hoeëgoet eûr kîndsjkîndjer di-j oeëver hoongert jaor zegke: “Mien oeëver-groeët-opa (oma) hieët hoongerj jaor gelieëje ’n medalie gewonne!“  Dao kunne ze mej opschöppe, mer dooje ’t daovör? En ajje geine profvoetballer (-ster) zeetj kujje d’r ouneet schatriêk van waere. Want det es gewoeën verkapdje minse-hândel woeëtj um miljoene gieët. Det hieët niks mieër met sport te make, geûftj eederein tow, mer ze ze zitte waal ammaol achter de kiekbuis as di-j miljonaers tieëge de bâl motte trappe. Nein, det waas in d’r tiêd van Abé Lenstra en kieper Piet Kraak toch wul ângers. Di-j kwoome gewoeën as hollandse joonges op eur fietske nao de wedstriêd en leepe gewoeën tösse de minse doeër zoonger doeër hordes gekgewoeëre voetbalfanate besproonge te waere. ’t Leefst zoeëje di-j gekke ’n stökske vêl van det idool aaftrekke en as rillekwie beware in ’n gouwe kisje.

Jaomer detj zoeëwiêt mette sport gekaome es det de toppers as aafgode vereerdj waere, totdet ze op eur dertigste ram aafgebördj zeen en in ’n verzörgingshoês vertroeteldj motte waere. Mieër waardieëring hebbe ve vör de echte sportluj di-j soondes eur rondjes jogge, roondkerre op eur fietske met bendj di-j op rupsbèndj liêke, en tennisers di-j vör de bewieëging en de kompeni-j eur bèlke oeëver de baan op-en-nieër hawwe. Wandelaars di-j in etappes 400 kielemaeter Pieterpaad loupe, zoonger de ieërste en de vlotste te wille zeen. Geneete vanne bewieëging zoonger ’t geluid van rînkelendje medaalies en klaterendje gêldjstökke achter in eure kop. ’t Zâl wul ’n aafwieëking van michzèlf zeen, mer ich gaef gein balle um topsport en blief d’r neet vör toês um te zeen wi-j ze zich aanne gaert wêrreke. Van d’n ângere kânt haoje ze waal völ minse bieëzig as di-j, lui-j oongeroetgezaktj, in eure praos di-j gekke  fanatiekelinge  ounog zitte aan te moedige, terwiêl ze det op hoongerte kielemaeters aafstand toch echt neet kunne huuëre. Mer ’t es niks noets. De Romeinse keizers wiste ’t al. “Panem et Circensis“ (Brood en spelen), waas ’t devies. Dan blieëf ’t gepeupel röstig. Mer di-j gladiatore kwaome d’r neet laevendj vanaaf. “Ave Caesar, moriture te salutant”.

Vertaaldj: “Juulke, ge hetj de komplemênte van di-j mèn di-j zich vör uch kepot gaon vechte”. En Julius knikdje minzaam. (Julius Caesar = Publiek van allwiel)

Het bericht Stamtäöfelkes aflevering 94: Hongsgelök detve gein herwerderi-j krieëge! verscheen eerst op MLA Stories.

Völ van det soeërt gezagdjes keûmtj oet de neteûr of van ’t aojerwetse boorebedriêf. Waat tûnktj uch heejvan: ’n kow maaktj  in e kerteêr mieër flaters klaor as twèlf mösse in ’n jaor. En nog ein vanne boor: ’t indj van ’n vêrreke es ’t begîn vanne worst. Mer vanne ângere kânt slachdje gein vêrreke vör eìn worst.

En ‘ne boor weit duuvels good waat ’n kow weûgtj, en daorum kan dae dus zegke: “Met gewêldj höfdje ’n kow aanne stert op”. “Nein”, mèndje ‘ne ângere: “Met gewêldj nèjdje ’n vêrreke”. Ich begin aan gein van bei-je, mer ajje zegktj: “Met gewêldj hawdje ’n fioeël tieëge ‘ne boum kepot”, zoeëj ich det fiesiek wul klaor kunne kriêge. Oeëver di-j oetspraoke kujje beej ‘ne pot beer nog oorelang beheî-j make, mer gaotj d’r neet vör oppe voêst, want waaje bezoeëpe dootj, mojje nûchter besneête.

’n Groeëte bron van Wieërter oetspraoke waas drej jaor lang de schuuërkalender dae Veldeke Wieërt oetgoof. Dae toûverdje eedere mêrrege ‘ne glumlach op eur smörft. En dan nog ’n spruuëk nao ‘ne aovendj  zwaor stamtaofele: “As ich smêrreges inne speêgel kiek, bin ich bli-j det ich geveûl vör humor heb.

AME !

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 93: Echte Wieërter Stamtaofelkâl verscheen eerst op MLA Stories.

De Beûlderberg woore toen nog neet zoeë begruudj wi-j allewiel. D’r woore mieër zandverstuuvinge, di-j zich met de wîndj verplaatzje. De spoeërlien most aaf en tow met de schöp zandvreej gemaaktj waere. En dan deenk ich trök aan de aoje Tranchee. ’n Venneke met iêskaod groondwater, det ontstange waas toen’t Beulderlienke opgehuuëgd most waere. As wichter goonge vae dao dek soeëmers spuuële int water enne zand. Zwumme waas verboeëje, mer det dieëdje toch. Stiekum eur zwumboks aandoon achter ‘ne brieëmestroêk of int spoeërhuuske waater toen nog stong, want dao mocht neeme nao kieke. En as d’r toch eeme kieëk, begoszje te kake: “Gae hetj gekieëke, voelik!” Vae bivakkieërdje d’rouch  met de verkenners, met Toeën van den Akker as pee-el (patrouilleleider) en Bartje Dechêne (oeëze wiskunde-lieëraar) as hopman. Ve moste eiges de tent opzette en ’n veurke stoeëke um aerpel inne heite asse te pòffe.  De gaele zând knarzje uch tösse de tang ajje d’r in bieëtj. Mer ge dieëtj nèt oftj lekker waas.  Ge zootj dao toendertiêd nog midde inne nateur, wieët vanne bewoeëndje wèrreltj aaf en det koszje vuurâl snachs mêrke. Herstikke doonkel waasj met ‘ne machtige sterrehieëmel zoeë-ajje ‘m awiel neet mieër kuntj bewoôngere vanwieëge  umgaevingsleecht. D’r waas gein kebaal van autoos of vleegmesjiene, en toch koszje neet slape in eur têntje, want de peddemuuëk  heële uch wakker en de zândvluuëj leëte uch dabbe vanne juuëk. Waat ’n mezaerie. Mer onvergaetelik miljaars schoeën!

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 92: D’n Tranchee naeve ’t Beûlderlienke verscheen eerst op MLA Stories.

Det waas ich ouch toen ‘n nonneke mich int gesticht zagt det ’t wul ‘s kos zeen, det ich aant oetdruuëge woor! Miêne hoêsmiddesienmân, dae ich det verteldje, zagt ongeluivig: “Gae waal!”. Toen waas ich weer gerösjgestèldj en gong ’t laeve gewoeën wi-jjer, mer ich zoeëj gaer “sliêp-oêt” tieëge det nonneke int gesticht gezâgdj hebbe . Ichzèlf kântj neet mieër, mer beej “sliêp-oêt” huuërtj ’n gebaar. Dan vaegdje met de wiêsvînger van eur rechterhând oeëver de oetgestoeëke wiêsvînger vanne lînkerhând, dae inne richting van ‘t  “slachtoffer” wiesj en tegeliêkertiêd roopdje “sliêp-oêt”. Eigelik ésj ‘n pesteri-j di-j allein doeër wichter gedaon weûrtj tieëge eeme dae ongeliêk hieët. Ich hebtj groeëte minse noeëts huuëre zegke of zeen doon. Dörreve di-j det neet of vînge ze det kîndjerèchtig? Of weit ein van mien laezers ’t baeter en zieët dan sliêp-oêt tieëge mich? Ich bin benoetj.

Det bringktj mich trök beej det firtelkûntje det ve ontwaardje op oeës terrasje. As ich tieëge mien vraw sliêp-oet zoeëj zegke umdet ich det pölke leever zoog as eûr, zat ze mich boete met de opmerking: “slîep-oêt”.

Mer noow blieftj de vraog: “Woeë keûmtj zoeë-n oetdrökking vanaaf? Dus neet waatj beteikentj; dèt wieëte ve waal. Mer woeërum? Eeme daetj weit kriegtj miên book Stamtäöfelkes vurniks.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 91: Zagdjae wul ‘s “sliêp-oêt” tieëge eme? verscheen eerst op MLA Stories.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 90: Weem es bli-j ajje toês komtj? verscheen eerst op MLA Stories.

Miên vader en zien femiêlie, geboeërtig van Meyel, koste dao waal nog oeëver vertelle. Asze saoves nao bèd moste, woeërt d’r gezagdj: “En noow oeëver d’n din, langs de mooshoeëfhègk nao ’t huuske en dan boete pisse, baeje en ‘t bèd in”. Want ’t huuske loog neet binneshoês. Gek eigelik: want de kuj mochte binneshoês schiête inne stal, zjuust wi-j ouch de vêrrekes, mer zèllef mosje nao boete, de frisse locht in um oppe boutkiet te doon waat dejje dao huuërdje te doon. Soeëmers ging det bêrreves, en swîntjers met de klûmp aanne poetekes. En asj reîngeldje waas gein lolletje, want ge mosj oonger d’n euzendröp doeër loupe en woordje al naat vuurdejje inne reîngel kwoomtj. En trök ‘tzèlleje. Ge haatj d’r waal vôlautomatiese stânkaafzuûging asj e bitje wèjdje en doeërspeûle moszje met ‘ne eimer water daeje met de pötgaffel oet de pöt troktj. Dae koszje ’t béste al pötte vuurdejje oppe kakdoeës gongtj zitte.

En det det schiêthoês boete stong, waas neet vör de stânk, want zoeë-n boeërderi-jke waas tot in alle heûk en gate doeërtrokke vanne stâllocht van ’t vieë. Dao hoofdje det boetetwalet neet aan beej te drage.  Ge kosj d’r neet aan ontkaome mer de bewoeëners zèllef roeëke det neet mieër. As zoeëne boorejong of dörske (= Meyels vör maegdje) gong dânse, koszje nog aan eur soondesse klei-jer roêke detze van boore-komaaf woore. Dao woore ze neet minder um, mer ze roeëke toch ângers as de stadse jongluj. Dao haadje ’n briljantienlocht umhaer hânge. Kale-kak-locht zoeë te zègke. Di-j boorderi-jlocht trok dus ouch inne klei-jer. Allewiel roêkdje âmper wat, of hieël niks, ajje langs ’n boorebebedooning kotj. En de buurt mer klage detj stînktj! “Frische Landluft”, zagte ve vreuger as ve tösse de akkers doeër fietzje en de boor waas aant tonne. Det stoonk wêrkelik penetrânt ’n oor inne wîndj en koszje tot käökes tow ongemoodj van waere. Det moog neet mieër en noow spuite ze de hieël zooj oonger ‘t aerd. Det dieëje ze vreûger al met faekalieje uut ’t huuske. Op d’n akker d’r mej! “Kringloup”, zegke ze allewiel.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 89: Oeëver d’n din nao-t huuske verscheen eerst op MLA Stories.

“Waat fein det ich uch nog ’s tref”.

“Ouch ‘ne goojen daa…….”en wieter kwoom ich neet want ze waas al hej-op aant woeërd.

“Noow loeêstertj toch ’s waat ich vuuërige waek mejegemaaktj heb, dao keûmtj mich dae Sjarel van Fried van d’n Hejgeurt tieëge, wéjje waal, dae kindje ouch, dae woeëndje indertiêd oppe hej, naeve di-j van Sjef de schîlder, di-j ’n dochter waas van ziên schoeënbroor, jaowaal di-j mojje good kinne, di-j kojje alledaag inne stad tieëge, want det es ’n lieëlikke jaksjieës, net zoee êrg as haezèllef, mer gelökkig zeen di-j wichter good opgeveud want di-j zegke uch alzelaeve goojen daag”

“Nein Fien di-j kin………………” “Jaowaal di-j kijje good, di-j hejje dèkzat gezeen, mer good, dae Sjarel woeëj mich wiês make det ziên schoeënmooder, wèjjewaal, det es di-j achternicht vanne gekke Nel eûre mins di-j vuur d’n oeërlog nog oppe Muuëleport gewoeëndj hebbe, in det hoês woeë later Kaat ziêne bèkkerswînkel haaj, dao kwoomdjae toch ouch altiêd, want di-j haaj lekker mik en ge huuëdje dao altiêd ’t hieël noets vanne stad, want di-j bazuindje alles roond, ich wil mer zègke, ge motj toch oeëtti-jje eure moond kunne haoje en neet âl waaje wètj aan eederein vertelle, want dao hieët neeme wat mej te make en kriegdje allein mer scheif gezichte van en heibel inne femiêlie, van mich zuldje niks huuëre”

“Fien, ich kwoom noeë……..”. “Noow loêstertj ’s waat di-j schoeënmooder in eur gedâcht haaj, ze woeëj de hieël koeëj, met d’n hieële-n poongel dae d’r in stieët verkoupe aan Chrisje, want dae hieët gêldj zat en zoeëtj good kunne betale, allein leûtje zien vraw stikke vanne êrremooj, det êrrem schaop, want di-j zitj noow geheûrdj met drej jong te koekeloeëre, mer dao zeen d’r mer twieë van hem, det dêrdje es van ‘ne vrieëmdje daetj oets tieëge ’t liêf geloupe es, en wejje waal, van ’t ein keûmtj ’t ânger, mer di-j koeëj es eigelik niks waerd en dao wiltj ’t völstevöl gêldj vör hebbe en zoeëvöl krieget d’r noeëts vör zelfs neet van Chrisje, dae toch zat poen hieët.

Ich kieëk smachtendj oet nao d’n ober, um aaf te raekene, mer dae waas neet te zeen.

“Noow mot ich waal zegke det det hoês op zich good oongerhaoje es, ’t zitj good inne verf en tieën jaor gelieëje zeen d’r nog now tuulkes op gelagdj, want vuur dae-n tieëd lieëkdje ’t wi-j ’n zi-jschoeëtel, mer det beraekentj ’t noow waal nog inne priês doeer, di-j kernâlie, mer dae Chrisje es ouch neet gek, mer um trök te kaome op dae Sjarel van Fried van d’n Hejgeurt dae jae good gekindj mot hebbe, dae zitj noow in Martinus en inne kamer naeve hem……………………

Ich kos afraekene met d’n ober en zagt det ich most gaon. “Gae zeetj toch altiêd zoeë gehaosj en gaeftj uch nog neet ’s tiêd um effe gezellig te wauwele”. Mer det leste huuërdje ich al neet mieër, oppe vlucht nao ’n ânger terrasje.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 88: Waat zèjje mich noow toch…! verscheen eerst op MLA Stories.

Mer eins inne paar waeke (of maondje?) moste alle matte nao boete en woeërte ze op ’n spesjaal daovör getummerdje rek gehânge en gingtj d’r met de matteklopper tieëgenaan of dejje d’n duuvel woeëtj schore. Ich hebtj dék zat gezeen en dan kwoome d’r wôlleke póf oet. Dus blieëk detj waal vandoon waas. Met ’n aerpelemèske woeërte dan de léste rèsjes kaugum d’r nog oetgepieltj en kos de mat weer nao binne. Dan hejje ’t allewiel toch gemaekelik met ‘ne stoeëfzuiger dae zieënen eigese wieëg zuktj en de koeëj zuûver höltj ajje de hort op zeetj. Behâlleve de kroêpgaetjes woeëte neet kan kaome. Mer aevegood gein vergeliêk met waat ’n hoêsvraw vreuger mos doon om d’n tispel zuûver te haoje. En tössedoeër koeëkdje ze nog de middeg, dieëj de boeëdschappe en wist ’t noets van de hieël buurt. Ongeluifelijk.

Oeëti-jje woeërt de matteklopper ouch vör opvoedkundige doelindje gebroêktj. Beej stoute wichter gong de boks umlieëg,’t wécht gong oeëver de kni-jje en d’r woeërt met de matteklopper op los gemeptj. Det goof ’n prachtig patroeën op di-j billekes mer waas vör de pasjênt in kwestie neet drèk lollig. Dao kojje awiel vör inne bak.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 87: Gehannes met hoêshaojelik getuûg: de matteklopper verscheen eerst op MLA Stories.

Mer weem esj oppe foto? Dezelleje mèn di-j vae in Oostende int badpak hebbe gezeen. Allein noow hebbe ze kompeni-j aan vrouwelik schoeëns, toendertiêd nog knappe pölle. (Jao/nein, zêllef in te völle) Van lînks nao rechs trefdje aan: De ieërste kin ich neet,  en dan Alouis Grein, Harrie Weerts, Nella Vaessen (zöster van vorst Zjang Vaossen en later getrawdj met Doeërus Rooymans), Josephina (Fien dus) Broos (zöster van de Wieërter schriêver en teikenaar Piet Broos), Maantje Stribos, Wies Ramakers (later getrawdj met Stang Matijsen), en PierreTeunissen.

En ajje eeme nog wat kedo wiltj doon: “Stamtafel Weert”en “Stamtäöfelkes”noow nog same vör 50 eurokes.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 86: Di-jzelleje mèn in ‘ne nep-vwatuur verscheen eerst op MLA Stories.

Oppe Noeërdervaart koszje altiêd al ieërder oppe iêzers roonddarre. Dao woeërt weinig gevare en di-j ligktj hieël inne vlaake, woeë de kaoj d’r baeter áán kan en dus vruusj ze ieërder tow.  Fein glaad iês wis hieël aan Beringe. Mer op âl di-j kielemaeters loog mer éin kefee: De Stoep aanne Meyelse brök. En det es vör ameteurs aanne krieëje kânt.

Vae blieëve dus leêver schaatse oppe knaal vanne statterbrök wis aan sloes zestieën. Dan koszje oongerwieëges nog effe oetröste beej Zjang van Wieke Graadje (Tullemans), Zjaak vanne Kuper (vd Schoor), Tieske vanne Hejgeurt (Vaessen) en beej de Boskrèj (van Leuken) amaol kefees naeve de knaal en aant indj haadje nog De Krim (Kremers). Det maakdje de trökwieëg d’r neet gemaekelikker op, mer waal plezeeriger.

Ge mosj allein neet tekort beej de schieëp kaome di-j dao aafgemeerdj woore, want di-j schippers heële, bang vör ’t kepotvreeze, de kant van eûr schieëp iêsvreej doeër met ’n haaks ’t iês kepot te hawwe.  Op zich neet zoeë-n prebleem, want ajje dao per ongelök inne buurt kwoomt, leepdje hoeëgoet éine naate siek op. Roontelum waas ’t iêes dik zat um uch te haoje.

Kûnstschaatse wi-j vae di-j allewiel kinne, bestoônge amper. Vae schaatsje op van di-j houtere lètjes woeë ’n iêzere strip oonger zoot. Noren neûmdje ze di-j en di-j moszje um eur hoeëg schoôn, of zèllefs klûmp(!!) vâstbînge en dao moszje op schaatse. Int begîn waasj mieër schravele as schaatse mer oppendoor kwoomdje d’r toch op vuuroet.  Mer di-j nondedjuuse dînger goonge eeders kieër weer los en dan koszje op eur kni-jje hoêke um ze oppernoets vast te bînge. Dan schoeëte d’r völ scheetgebedjes de helder vreêslocht in. Nondedjiebdjèllo! In di-j houtere schaatse haadje ounog twieë soeërte: Met of zoônger kröl aanne naas. Met di-j zoônger kröl moszje waal speegelglaad ies hebbe, want aster ’n brökske vâstgevroeëre iês op eure wieëg kwoom, gongdje op eûre snuffert. Mét kröl waas det gevaor minder. De schaatsendje paters wiste dao wieëg mej. Kiekt mer oppe foto van Stamtaöfelke 8. Zoeëj de knaal nog oeëts towvreêze?

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 85: Zoeëdje nog oeëts kunne schaatse oppe knaal? verscheen eerst op MLA Stories.

As wécht zeendje gongdje nao schoeël, en tösse de middeg nog op-en-nieër um wêrrem (!!!!!!!!) te aete, te voot of mette fiets, doeër alle waer. De groeëte minse ouch. Mooder koeëkdje de pot tösse de was  en ’t zwabbere doeër. En saoves boeëterhamme. As de wichter um ’n oor of veer oet de schoeël kwaome kriêge ze waal al vuuraaf ‘ne boeëterham. Ich weit nog det ich in daen tiêd staondjes ’n half mik met pindakieës opvroot. Saoves móster vleis of kieës oppe boeëterham.  Reîngel? Allewiel pakdje d’n auto um na de breevebös (woeë staon di-j nog?) of de sjinees te gaon. En tösse de middeg motte de wichter op schoeël opgevânge en bieëziggehaoje ware en zèllef kriejje op kentoeër of wêrkplaats ‘ne wêrreme hap woeevan ze zegke detj ‘ne gezonde maoltiêed es, bestaondje oet ’n zaote, met mael aangedikdje sop en ’n vètte krekèt…..lekker mân! Saoves zidje hieërlik te smikkele achter d’n tillevies van de in de magnetron opgewèrmdje wêrreme hap oet de deepvries van AH. Woeë es de wêrm hoêselikheid geblieëve woeë pap en mam met de wichter smêrreges, smiddes en saoves same aane taofel zoote en de femiêlie-perikele oppe taofel kwaome en geregeld woeërte?  Heibels woeërte dao beejgelagdj en vae woore kontênt. Komtj dao noow ’s um? Oeëver ’t waer haaje ve ’t âmper. Want ’t es toch gei waer!

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 84: Det bestieët neet: Gein waer! verscheen eerst op MLA Stories.

Mer um allerlejse vuuëgel, knienkes, eikuuërkes, boummarters, aendjes, schollevare, zwane en nog hieël völ ânger vieë te bekieke, mojje dao vör ’n aardigheid ’s gaon kieke.

Oeëtt-jje asj hieël stil en röstig es, zeeje wul ‘s ’n paar reetjes (di-j op veer puuëtjes bedoel ich) en ich heb zelfs oeëts damhertjes gespotj. Aant Geurtsven zitte iêsvuuëgelkes en eine kieër veel miên oug zelfs op ’n blawborstje. Ge motj allein effe de tiêd inne gate haoje dejje dao vanne nateur wiltj gaon genete. Oppe vuurmiddige hejje völ kâns det hordes trimmers wi-j tapirs oeëver de bospaej galoppieëre en soondessmêrreges loupdje d’r neet zoonger liêfsgevaor oppe smaal paedjes, want dan meine bendes van 10 tot 20 raadgekke fietserenners um ’t haardst op de smaalste paedjes te motte ri-jje en godverre ouch nog ajje neet oppe tiêd opzi-j springtj. De aso-knörfte!  Ze kunne nog neet ’s laeze, want oeëveral staon bordjes met de tekst “Hier niet mountenbiken”. Mer di-j tapirs en fietsers hebbe gein oug vör ’t schoeëns waat det gebied te beej hieët. Zundj! Op di-j ti-jje mojje uch dus dao neet laote kieke. Mer soeëmers hieël vreûg inne mêrrege kujje de zon boeëve d’n Iêzere Mân op zeen gaon, en zittendj op ’n bênkske, met ’t fluitkonzert vanne vuuëgelkes, waer ich dao hieël gelökkig van. Effe later keûmtj d’r laeve inne brouweri-j as Mart van Haps de bieëste vanne kîndjerboorderi-j gieët verzörrege en voore. Ouch de hertjes kriêge eur deil.

En (eindelik!) zeen ze bieëzig met groeët oongerhaod van det prachtg gebied en mèj zeen d’r dan ieëmelike mèn, di-j meine det alles verkieërdj gedaon weûrtj. Want di-j steurluj aanne wâl wieëte ’t stökke baeter as dae bosbouwinzenjeur dae dao jaore vör gelieërdj hieët. De prekerts!

Wandelendj met mien kleinwichter zagte di-j tieëge mich: “Opa, waat zitte heej völ knien, want oeëverâl ligke knienskuuëtele”. “Nein, kiektj ‘s, dieës kuuëtele zeen wat groeëter as di-j vanne knien, di-j zeen van ’n kudde schäöp, di-j heej ’t onkroêd kort haoje.”  “En opa, waat zeen det vör spoeëre oppe groond? Di-j streepkes ammaol?” “Jeh, di-j zeen van ’n völ vuurkaomendj waeze, namelik de gestokte homo erectus, ofwaal de nordicwalker, dae zich staondjes mot haoje doeër zi-jlings klöppels as stuuën te hantieëre”. Zoeë mojje di-j jong wat beejbrînge.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 83: Waajje inne nateur tieëgekomtj verscheen eerst op MLA Stories.

Mer eigelik esj int hieël laeve zoeë. Gewuuëndjes zeen wi-j ‘ne jas daeje aandootj. Ge zitjer neet aan vâst mer ge misj ‘m asse d’r neet es.  Wi-j ich nog neet zoeë lang gelieëje eedere zaoterdigmêrrege um hallef nuuëge nao de mêrrentj gong, wist ich vantevuuëre weem ich dao tieëge zoeëj kaome. Sollie Bergmans, Miel Haenen, Ben van de Kruis, Piet (Veldeke) Hermans en nog e paar.

En asze d’r neet woor dachdje: “Zoeëje zeek zeen?”.  Det waas nog inne tiêd det de greuntjes nog neet in ’n înkele verwèrmdje supermêrrentj-tênt te koup woore, mer aan ’n paar kräömkes inne oeëpe locht. Dan koszje ’t d’r same oeëver hebbe waatvör gruentjes dejje di-j waek zoeëtj aete. En de greuntjesboor (in eige persoeën!!!) zagt uch waat ’t vörste en goojekoupste woor. En dae heeël in ’t sezoên ’n kisje kni-jboeëne vör uch achter, umdette wist dejje daonao zoeëtj vraoge. Vergânge ti-jje…………….. Ich ving d’r niks mieër aan oppe mêrrentj. Ajje noow ‘n (weliswaar leef) bedeensterke vraogtj nao kni-jboeëne of kappesmoos, beloôre ze uch oof dejje van ’n vrieëmdje planeet kotj. “U moet daar maar eens kijken, meneer”, en dan wiesj ’t met z’n vîngerke êrreges nao achter inne tênt, verlîchtj wi-j ‘ne bâlzaal.

“Börsj”, deenk ich dan en haal miên krolmoos en poor beej Mart Nouwen, rechtstreeks vanne boor. Onbespoeëte, det dan ouch nog.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 82: Waat esj kloeëte waer allewiel verscheen eerst op MLA Stories.

Vanne boor krieëg ich ‘ne groeëte stroonk komplieët met wortels, dae ich toês boete int aerd inne bloompot heb gezatte. Dao heb ich d’n hieële-n wîntjer zat aan. En van ’t restânt maak ich ’n smakeikke dikke booremoosroumsop met wat knopsêlderi-j en prej. Resept via e-mail ajje wîltj. Smauze mân!

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 81: Booremoos es krolmoos int plat verscheen eerst op MLA Stories.

En zjuust wi-j allewiel nog, waas de Diesterbaan ’n verlingdje vane Keulerstraot en leep via de Kruuspieël en de scheetbaan di-j dao vreuger loog. ’t Waas doeër de jaore hear ‘ne belangriêle handelswieëg tösse Kölle en Diest.

Ajje neet de Houtelingswieëg opgaotj mer de wieëg nao Dennenoord volgtj, gaoje umtreentj oeëver de zândpaad dae dao vreuger loog en dwaers oeëver ’n militaer oefenterreinke leep. Ouch met ’n soeërt stormbaan met houtere en gemetzje hindernisse woeëje as wichter fein op kosj klumme en vanaafvalle. Mer ’t spannendjst woor ‘ne oongeraerdse gânk in ‘ne berg dae’n indje wi-jjer weer oetkoom. Dao koszje oppe kni-jje doeërhaer kroêpe en det woor toch waal spannendj want aster uch eine tieëgekwoom van d’n ângere kânt inne stikke doonkele, moszje d’r achterstevuuëre weer oet zeen te schravele. Klein wichter maakdje vae bang doeër te zegke det dao de wöllebäö in zoot, mer oongertösse kneipdje vae um zèllef ouch. Soeëmers kwoome vae dao aldaag langs as ve goonge zwumme in d’n Iêzere Mân. En as ve trökkwoome blieëve vae op det terrein altiêd nog effe spuuële en kroeëpe doeër dae-n tunnel. Dan kwoome ve nog zwèrter toês as vuurdet ve goonge zwumme!

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 80: Woore ve echt bang vör de wöllebäö? verscheen eerst op MLA Stories.

Oppe foto mis ich ’t gaat inne moor met ’t hinnelei-jerke d’r vuur woeë ’t pluumvieë doeër en oeëver nao binne kost um oppe roest te gaon zitte um de nacht doeër te brînge.Det mot d’r zieëker êrges zeen. Dan lagte ze ampessânt eur eike in ‘t daovuur getunmmerdj kisje. Dan kwoom smêrreges de boorin de eier rape in ‘ne pot, want di-j dacht altiêd: “Lever ’n eike inne pot as in ’n hoondervot”.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 79: ’n Aojerwets boorebedriêfke verscheen eerst op MLA Stories.

Aanne stamtaofel woeërt d’r drök gedillebrieërdj oeëver ’t nut en onnut van geite. In vreuger ti-jje haadje aan eeder boorderi-j wul ’n geit aan de tujjer staon. Oetti-jje zelfs mieër. Det woore nuttige bieëste, deenstig vör van alles. Ajje ze aaf en tow vertujjerdje hele ze uch doeër eur vraatzucht ’t hieël erf en woeëjtj noeëdig waas: de mooshoeëf kaal van onkroêt. Want ’n geit blieftj d’n hieëlen daag aant vrieëte. Gazons haadje vreuger beej ’n boorderi-j neet, want det waas zundj van de groond dae bepoeëtj kos waere met moos, greuntjes of oeëftebuim. Mer op ’t graas oonger di-j oeëftebuim stong zoeën geit gaer en dieëj z’n best ’t graas kort te haoje.  Verder waas zoeën bieësje ‘ne gooje waakhoond. Want zoeë gaw as zich eeme leet kieke op ’t êrf begoste ze te mekkere. Mer umdet ze det tössedoeër ouch dieëje loêsterdje dao neeme mieër nao en waas det âl-met-âl dus vör law loêne. ’n Wieter vuurdeil van ’n geit waas det ze lekker en gezonde mêlk, wat vétter as kowmêlk, goof. Nein, allicht, de bok neet neteurlik! Minse di-j noow op gevorderdje laeftiêd zeen en opgruuëdje op ’n boorderi-j zulle nog beej hoeëg en lieëg bewieëre det det de lekkerste mêlk woor di-jje kosj drînke. Vörs vanne geit. Waaje tevöl haatj aan mêlk, dao woeërt kieës van gemaaktj. Dae koszje wat langer beware, mer woor nao wat langere tiêd wul zoeë strang van smaak dette amper te smauze woor. Di-j soeërte kieës kujje allewiel nog altiêd koupe, mer waere, op ’n înkel Frâns boorderi-jke nao, febrieksmatig gemaaktj.

Inne oeërlogsjaore haaj völ minse inne stad ouch ’n geit achter in eur huuëfke staon.

Vör de mêlk en ’t vleis asze geslachtj woeërt. D’n hieëlen kuuëke-aafval, waat ve noow GFT neume, ging doeër de geit hieën en kwoom as kuuëtele inne mooshoeëf terecht. Det bieëst haaj dus völ nut. Beej os inne Muuëlestraot stong de geit te mekkere op ’n stökske graas oonger de körseboum. ’t Woeërd gazon waas nog neet oetgevoonge. Naeve os woeëndje de “Kleine zusters van de Heilige Jozef”, ’n zusterorde van d’n heilige Savelberg, di-j wêrkzaam woore op ’t kleezje, waat dao weer naeve loog. Euren hoeëf waas gescheide van dae van os doeër ’n hoeëg moor. De nonnekes koste de geit dus waal huuëre, mer neet zeen. Det voonge ze jaomer en leeëte det bliêke, doeër de geit nao te doon en mekkere. Det waas lache! Toen hebbe ve ‘ne kieër met z’n alle de geit opgehoffe en oeëver de moor beej de nonnekes gezatte. Det waas kuit! Zoeëwaal vör de zusterkes as vör os. De geit zelf waasj d’r duudelik neet mej ins en lieêt det oetdrökkelik huuëre. Later woeërt ze geslâchtj en ’t vleis ingewèktj um inne wîntjer te aete te hebbe. Zjuust wi-j oppe boorderi-jje.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 78: Woeë deene geite eigelik vör? verscheen eerst op MLA Stories.

Dao loog in vreuger jaore ouch ’n kefee di-j ze de Panneschop neumdje. Dao waas ‘ne Lambers de kastelein, mer later woeërt det Bruinaers oet Ni-wieërt en hèdje ’t De Klûmp. ’t Gebuuërdje ’s det Leentje vanne Kloomp (Klûmp ??) beej de kefee oppen hook van d’n Doeëlhoeëf, D’n Hook dus, zich tezieër begaajdj haaj aan pîlskes, zoeëdetj neet tegooj mieër oppe bein kost bliêve staon um te voot op heivers aan te schravele.  Dao wiste e paar mèn aanne tap wul raod op, looje Leentje op ’n kroekèr en voordje ‘m rechtowrechtaan op hoês aan. Toen ze oppen trökwieëg de kèr weer netjes achter inne schop haaje gezatte, goonge ze zich nog e pîlske pakke aane tap en weem zoot dao?  Jaowaal: Leentje! Det waas van de kroekèrrit hieël bekaome, haaj zich de bein d’r weer oonger gezatte en pajje de korste wieëg trök oppe kefee aan en gong gewoeën wieter woeëtj effe trök mej oetgeschèdj waas: beer drînke.

In ’t book Stamtafel Weert, waat weer ter koup es, stieët kefee de Hook beschrieëve en waere de Panneschop en de Klûmp ouch geneûmdj.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 77: Wi-j kojje toch aan ‘ne beejnaam? verscheen eerst op MLA Stories.

Woeërum ich dit schrief? Ich krieg oeëti-jje schriefsels inne hang van jonger minse, woeë ich deks gein wiês oet kan ware, zoeë abominabel di-j schriêve. Weûrtj dao oppe schoeël neet mieër op geletj? Vae krieëge vreuger tikke oppe vîngers ajje neet netjes genog schrieëftj. Det moog allewiel neet mieër, want dan esj al gaw wichtermishândeling en kaome pap of mam de meister of jufraw oetkaffere det ze met eur fikke van eur braaf en leef kindje aaf motte bliêve. Mer dus lieëre ze neet tegooj schriêve en kriêge noeëts ’n tieën met ’n griffel. Daotieëgenoeëver mojje ’t handschrift van aojer luj ’s zeen. Di-j hebbe in eur jong jaore netjes schriêve gelieërdj en det kujje noow nog mêrke, want det es good laesbaar. Behâlleve det van dokters, di-j hebbe eur eige geheimschrift liêktj ’t waal.

Mer, dînk ich dan beej m’n eige: woeë maakdje uch drök um? Weem schrieftj d’r eigelik nog mette hând? Tezégkes neeme mieër. Zelfs d’n dokter neet. Messchiens nog ‘n eiges geschrieëve nowjaorskaart nao de buurmân of ânger minse di-jje aldaag tieëge-n ’ t liêf louptj. Waarschiênlik um te laote kieke dejje ’t schriêve nog machtig zeetj, want ichzelf zegk uch leever “Zalig Nowjaor” as ich uch inne ouge kan kieke en de hand kan gaeve.  Leefst beej e pötje beer neteurlik.  Dae poszegel spaar ich mich, want vör drej zegels hejje al ’n pîlske. Wis dan!

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 76: ’n Tieën met ’n griffel? verscheen eerst op MLA Stories.

Vreuger waas d’r ’n lidje: “Zoeë keumtj det schoeëns van Wieërt weer stillekes vuur d’n daag ……………….” Ich heb det hieël lidje, komplieët met koeplètte nog op pepeer staon. Det es oet d’n tiêd det de börgers nog gruuëts woore op waat ze haaje in oeës stedje. Det motte ve gaon verangere in: Zoeë verdwientj ’t schoeëns van Wieërt weer stilekes vanne kaart…………”.

Dao deenk ich aan as ich bevuurbieëldj dieës foto bekiek van de Palmenhoeëf, dae indertiêd aan de Lourdeskapelstraat loog. ’n Prachtig markânt gebouw, ’n seeraod vör de hieël umgaeving. Indertiêd boetegood van börgemeister Kortman, de kleuterschoeël hieët d’r ingezaete, ’t woeërt gebroêktj as gemeenschapshoês, de Kajotters (de jongere van de kattelieke boond) hoeszje d’r, d’r woor ‘ne spuultuin beej en waat nog neet mieër allemaol! Eederein waas d’r bli-j mej. Nein, doeërgedrèjdje plannemaekers met hiestories benûl waat korter woor as eur naas lânk waas, mèndje det det most verdwieëne vör ’n staoteplan wi-j ’n schaakbord met ammaol inse riekeshoêzer. Ich kan d’r noow nog giftig um waere.

Ajje de foto tegooj bekiektj zeeje detter nog ‘ne zândpaad vuurdoeër luiptj. Dae leep vanne Kieëntjerkêrrek nao ’t Moêzekepèlke en hoot dao ouch nao: de Lourdeskapelstraot. Lînks d’r naeve loog ’n prachtige boorderi-j di-j neumdje ze Schaokehoeëf (Schaekenhof) en daotieëgenoeërver loog ’n brandkoel woeëje int vuurjaor koêleköpkes en staekelkes kosj vange. Det vergaet ich vanze laeve neet, want ich heb dao ’n paar kieër ingelaege. Mer det es allemaol nao de kloeëte gehôllepe en es allein nog mer memorie. Haaje ze um di-j hiestoriese gebouwe neet umhieën kunne bawwe, en d’r ’n middelpunt vanne buurt van kunne make? Ich deenk ’t neet, want op ’n teikentaofel kujje allein mer rechte lienkes teikene. Kroomp kân neet, net zoeë mîn as ’t verstand van de ontwêrpers.

En ich dörf te wedde detj dalik zjuust zoeë gieët met de mouttoeëre. Want di-j naaze zeen neet langer gewoeëre en dao bungele allein mer euroos en dollars vuur di-j ‘ne wieëtere blik en bezeî-j van di-j staeknaze totaal belemmere.

Passendj in ’t sträötje van di-j nul-bezêj-minse, en waat raodslid van Dooren ouch opperdje: braektj de statterkêrk aaf, want dao keumt amper nog eeme, en dan kiegdje ’n hieël groeët kaal plein woeëje fein plevuûze op kuntj legke en dan zette ve inne midde ’n standbieëldj van di-j mèn en besteurders di-j âl aaf wille braeke. Det standbieëldj hieët ’n gemeinschappelik doel: dao moge de minse di-j waal benûl hebbe vör hiestorie tieëge-n-aan zeike. Dan hèjje dèt toch!

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 75: Zoeë keûmtj det schoeëns van Wieërt…… verscheen eerst op MLA Stories.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 74: Zeen vae braver gewoeër, mèndje? verscheen eerst op MLA Stories.

En van Cis de Kapper (Smeets), de ongekruuëndje kuuëning van Luuëke enne Zweeloeëre, doon ouch verhaole de ronde. Hae haaj zien schaersalon inne Bieëmdjestraot, schuuns tegenoeëver de “Hof van Leuken”, woeëte dus nao sloêtingstiêd mieëstâl te vînge waas. Ziêne salon zoot d’n daag doeër ammèr vôl met minse, neet allein um te schaere en knippe, mer um zich te ammezieëre met de kâl van Cis, dae d’r oeëti-jje ‘ne varieté van maakdje. D’r woeërt dèks nog mieër gelache as inne kefee d’r tieëgenoeëver. Cis vroog ’s aan ’n mènke in ziêne schaerstool, wi-jte z’n haor gaer gesnieëje woeëj hebbe. “Van achter kaal, vanvuuëre lânk, lînks gekröldj en rechs bebop”.  “Det kân ich neet”, zagt Cis. “Jaowaal”, zagt ’t mènke, “want zoeë hejje ze mich de vuuërige kieër ouch gekniptj!”

Barbeer Cis haaj nog ’n aojerwetse transportabel knip- en schaerinrichting, woeëte gaer mej op mêrrendje met Oude Ambachte stong. ‘nen Aojerwetse schaerstool, staondje speegel met taofel, schaermes met wétlaer en ’n kumke um de schaerkwast inne schoêm te duipe. Manslu-j stoonge inne ri-j um zich nog ’s op ’n aojerwetse meneer doeër kwaffäör Cis te laote schaere. De kwast woeërt in ‘t kumke gesoptj en daomej ’t hieël gezicht dik oonger de schaerschoêm gezatte. Met doem en wiêsvinger vanne lînkerhând heëlle dan ’n stökske vêl strak gespanne en met de rechter snieëje op dae plek de baard aaf. Dan woeërt ’t mes aan ‘ne handdook sekuur aafgevaegdj en kwoom ’t vollegendje stökske baard aanne buurt. ’t Waas ’n hieël rieteweel, woeëbeej Cis z’n moelwêrrek aevegood neet stil stong.

Wi-jte met zien reizendje schaersalon ‘ne kieër met de Stedelikke Hermeni-j in Oeëstenriêk woor, es hae beej ’n wandeling van ’n steigerke int water gevalle. Det hieët ‘m gei good gedaon, want hae es noeëts mieër aane gang gekaome.  Hieël jaomer!

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 73: Ouch kwafäörs kunne d’r wat van verscheen eerst op MLA Stories.

En dao zeen di-j aojer minse noow zjuust vanaaf, en det gaajt eur. D’r zeen d’r waal beej di-j tössedoeër oppe kleinwichter motte passe uut arigheit of nooëj, en di-j hebbe dus geine tiêd um aanne stamtaofel te kaome zitte. Ich zeen ze langs schuufele en met ’n schael oug nao oeës terrasje kieke. “Kos ich dao mer beej gaon ziite”. Mer hae es deenstdoondj sjefeeur vanne wichterwage en de supervizor luiptj d’r naeve en höltj ‘m van det heiligehuuske aaf. “Dette mich dao nondedju neet beej inne kroeg gieët zitte!” Êrrem minse zeentj, di-j nog zoeëvöl plezeer int laeve zoeëje kunne hebbe en mich verhaole van vreûger koste vertelle, mer ich moog ze neet achter dae mamma-tênk oet sluuëre. Ze hebbe wul ‘s ’n wieërwoeërd: “Mien vraw koeëktj vanaovendj, en as ich te laat toês kom, koeëktj ze nog haarder!” DUS: koeëktj zellef waat uch gaajtj. En ’t alternatief es bitterballe en kieës met sopsuiskes vanne kastelein(se), want dao paajtj hae (of zeûj) uch mej. Hiêmaol neet êrreg asdejje daomej kontênt zeet en kâl zat hetj aanne stamtaofel. Toês zèdje uch dan achter d’n tillevies, slaoptj dao ’n eûrke en gaotj dan nao bed. Waat e laeve!!!!

Ge motj ’t neteûrlik neet tewiêt late kaome, wi-j Bert van Hubèr van Merie vanne Foo gebuuërdje. Dae waas wat doeër de stad gezwâllektj, haaj zien heiligehuuske beej Mam de Borgie aangedaon en schraveldje nao wat glaze beer en zjenaever oppendoôr met de hând langs de birgitinessemoor inne Maasstraot stillekes aan heivers. Mer toen woeëje nog effe beej De Tram nao binne, mer dao pakdje Tinus Broeëds ‘m beej z’ne kraag en bókseboeëm en zagt: “Gaotj mer trök woeë ze uch zaat gevoordj hebbe, heej maakdjae gein spatjes mieër!”, en zat ‘m boete. Dao hieët di-j Groeëtmoel (zoeë neume ze di-j vanne Maasport!) doeër Tinus völ van gelieërdj toenne nog joonk woor, want det waas nog vuurdet beej de kefee van Mam in november 1968 de schaoj oppe knip ging. ’n Groeët verlees vör ’t Wieërter kefee-laeve, woeë ve ’t aanne stamtaofel nog dék met völ emosie oeëver hebbe. Zwêllege in nostalgie zegke ze dao-tieëge, en det es beej ’n pötje beer hieël neet êrreg. Det es gezamelikke memorie.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 72: Gae hèjjet toch ammèr oeëver vreûger? verscheen eerst op MLA Stories.

’n Kefee di-j dao neet in stieët es kefee De Graaff aanne Mêrrentj. Ajje uch det nog kuntj memorieëre zeeje dik nuuëgentjig jaor aod want ze es in 1930 umgebowdj. Mia de Graaff (Mietje Hakkededie) es dao geboeëre en groeëtgebrachtj, mer di-j ki-jjae allein mer as Mia Rechmann-de Graaff. Getrawdj met Franz (jao, met z) Rechmann, dae in d’n ieërste werreldjooeërlog gedissertierdj woor oet ’t leger vanne Pruuse en zoeë in Wieërt terecht kwoom. Neeme weit mieër det dao ’n kefee woor, mer oppe roêt boeëve de duuër oppe foto stieëget hieël duûdelik. Ge zeetj heej ein van de mieëst frappânte fotoos van Aod Wieërt. De kefee woeërt ‘n elektrozaak en de kloompewînkel d’r naeve woeërt schoonwînkel Leyendekkers. En ’t pând daonaeve, woeë Dré Koeëleke (Coolen) as paekviêster zoot, waas ieerder in hang van de gezösters Verschueren di-j dao ’n kommestiebles- en mannefaktuuërezaak haaje. Ge kuntj de reklaam van Maggi nog zeen. Det woor konkerrênsie vör de Roeëje Matjeu (Kneepkens) d’r tieëgenoeëver dae in koloniale ware dieëj, mer ouch as groeëthandel, woeë di-j port vör deendje woeëje met paerd en kèr oppe binneplaats kosj kaome. Di-j port es allang ewèg en dao kwoome now hoêzer vör inne plaats, woeë later de “Maas- en Roerbode”(Tante Bet) zieënen intrek haaj met ’n etelaasj woeë de minse de gezèt avvâst koste laeze (foto-inzet). In dae’n tiêd (en det waas d’n tiêd dae vae aanne stamtaofel nog good in memorie hebbe) hoezje daonaeve Väös Janssen dae inne zoeëmermaondje eigesgemaakdje eiskout verkocht en woeë de minse beej wêrrem waer tot boete inne ri-j stoonge te wachte um ‘ne lèk-eiskout te bemachtige. Ge haatj d’r al eine vör ’ne knab en ich mein det d’n deûrste ’n kwartje koszje. Twan Schoenmakers (op z’n veerennuuëgentjigste twieë jaor gelieëje d’r tössenoet gepieptj) waas getrawdj met ‘n dochter van Väös. Det beteikendje waal dette op drökke ti-jje as eiskoutopschöpper de femiêlie beej most sprînge um de waar aanne man/vraw te brînge.

Waat ouch opvèltj zeen de gaaslantaers lînks aanne gaevel en inne straot. Daovör ging d’r saoves en smêrreges ’ne mins met ‘ne stek met häökske de stad roond um ze aan en oet te doon. Det haaje vae as kwaojong aafgekieëke en klomme e inne paol, trokke aant ringske en dan bördje de lantaer. En vae de klater op! Det zâl det mènke lînks oonger met z’n klûmp wul neet gelöktj zeen.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 71: ‘n Onbekindje kefee aanne Mêrrentj? verscheen eerst op MLA Stories.

Frits Weerts (1939) doet zijn inspiratie op aan de stamtafels van de Weerter etablissementen, voorzien van een goed glas bier, potlood en notitieboekje begeeft hij zich maar wat graag aan nieuwe aantekeningen en vertelsels.

Deze gloednieuwe verhalenbundel met 60 sterke, op waarheid gebaseerde, ‘Wieërter verhalen’ is voorzien van foto’s en illustraties, en maakt een prachtig cadeau voor de aankomende feestdagen, om voor te lezen of te bewaren voor kinderen en kleinkinderen. Weerts geeft met deze bundel maar wat graag de verhalen door die vroeger in Weert de ronde deden, over mensen die in Weert werkten, leefden en ‘kloeëdje’.

Van ‘Piêpekrolle’ tot aan ‘Snuîk’ en van de ‘Mêrrentj’ tot aan ‘Luuëke’, er is niets dat Weerts onbesproken laat. ‘De stamtafel’ was ooit in vrijwel elke kroeg een heilige plek. Een plek waar je niet zomaar ging zitten, want hier vond je de vaste stamgasten, van elke pluimage. Van ‘gewone’ werklui tot aan deftige heren, allemaal kwamen ze bij elkaar in het café en aan hun eigen stamtafel, dit alles op basis van kameraadschap en gewoonte. Zo genoot men van een glas bier en werd er o.a. kaart gespeeld. De verhalen in dit boekwerk zijn een vermenging van ‘sterke verhalen uit de kroeg’ en herinneringen. De humorvolle en vlotte schrijfwijze van Weerts zorgen voor nostalgie en een glimlach van oor tot oor bij iedere lezer.

Voor degenen die de boekpresentatie niet bij konden wonen, om welke reden dan ook, Frits Weerts heeft een aantal signeer momenten ingepland staan bij boekhandel Bruna, Markt 11-13 te Weert. Te weten op zaterdag 23 november 2019 en op zondag 01 december 2019 van 14:00 tot 16:30 uur. Het boek is dan te verkrijgen voor jezelf of als cadeau, voorzien van een persoonlijke noot van de auteur.

Het bericht Nieuwe bundel Weerter dialect verhalen verscheen eerst op MLA Stories.

“Waat gieët oeës Wieërt toch stêrk vuuroet,weem zal det nog ontkinne? Mer detze knoeëje aanne taal…., waat gaon ze toch beginne? Waat gieët oeës Wieërt toch stêrk vuuroet, op allerlei-js gebeed. Mer detze ’t Wieërs verhollandse, det deut moch toch verdreet.” Det schrieftj dus dieëze Wieërter monnik int begîn of midde van vuuërige ieëw! Toen al! Dit gedicht beslieëtj 10 koeplètjes en es alleszins de moote waerd um gelaeze te waere. Ich wil ’s naogaon of ich dieës verzameling in ’n alik book in ’t allewielse Veldeke-wieërts um kan zette en oppernoets aan de dialektleefhebbers aan kân beeje.

Mer um trök te kaome op dae Trappist: met Doeërus vanne Trumpert zoeëj ich gaer wat naomiddege doeër gebrachtj hebbe op ‘ne kefeestoep, dus met eine orzjinele Trappist inne hang en eine vùùr mich. Want ouch echte Trappiste zeen dao neet vies van. Zeuj motte ‘m toch altiêd preuve vuurdette de duuër oet gieët um verkochtj te ware? Ich zoeëj dao best beej wille hêllepe, mer gaon d’r neet vör int kloeëster.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 70: Waat ‘ne Trappist al neet deut! verscheen eerst op MLA Stories.

De goojekoupste snuik daeje kosj koupe waas joedevét. Oonger ângere ouch beej Merie van Pietje Kamp en beej Mieke-Betje. Neet beej Jamin (op z’n Frâns!), want dao waas di-j zaak te gerinnemieërdj vör. Joedevet waas aafvâl dae beej ’t make van aerpelstroeëp aant mesjien blieëf plèkke. Det schraapdje ze d’r vàn en dan heeldje’n bitje véttige, haarde witte brokkele oeëver en di-j verkochte ze as snuik. Ge mosj effe op det vétèchtig genuuëks bliêve knauwele ieërdejje ’t gongtj preuve, want ajje ’t zjuust in eur bakkes haatj, waas d’r gein böl aan. Doeër ’t knauwele woeërtj ammèr zeûter. Totdejje ’t oetspi-jdje. Ich hebtj ewiel noeëts meer gezeen en weit neet oftj nog te koup es. Mer asj zoeë zoeëj zeen, gaon ich d’r mien kleinwichter neet fael op make. Dao weit ich waal wat lekkerders vör. En woeë deendje dan dae aerpelstroeëp vör? De bekkers gebroêkdje det as vervânger van sókker in kukskes en ânger zeûtigheid. Det waas lekker goojekoup. Oftj nog gebroêktj weûrtj, wieëte ze zelfs aanne stamtaofel neet. Mejjèh, dao zitj ouch geine bekker beej. En asj toch zoeëj zeen, dörftje ’t eiges neet te zegke, bang det vae meine dette de zaak besodemietertj. En zoeë esj ounog ‘s!

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 69: Snuik daeje allewiel neet mieër zeetj verscheen eerst op MLA Stories.

Kermèlle zoote toendertiêd nog verpaktj in ’n dun vet-êchtig pepeerke. Ouch dao koszje nog wat mej doon. Det pepeerke moszje inne lingdje döbbel vaoje en de rèndjes e tikkele umkrölle. Ajje ’t dan tösse twieë veengers heeltj en vör eure moond zatj en ge bloosj d’r tössedoeër, huuërdje ge ’n feêpendj geluid. Dao koszje, met wat fantasie, meziek mej make. Welk wécht kintj det allewiel nog? Welke pap of mam deût eur det nog ’s vuur?

En waaje allewiel ouneet mieër kuntj kriêge (of koupe) es aojerwetse snuf. En neet dae droppoejer daeje waal nog kuntj koupe. Beej Miekebetje aanne Kestieëlswâl koszje vör ‘ne sênt snuf koupe. Dan woog Mieke of Betje, want det woore twieë ongetrawdje zösterkes di-j det wînkelke dieëje, e paar gram aaf in ’n spits buulke. Ajje dan weer boete stongtj, bieëtje met eur tang oongeraan ‘t pûntje van det tuûtje aaf en dan koszje dao met bitjes de snuf oet zabbele. Waater presies inne snuf zoot, weit ich neet. Ichzelf dacht aan gemale zeûthout. Ouch wat zaot, aanne smaak te zegke. Messchiens nog ânger spul. Weem geuftj mich ‘t resèpt?? Zeuthoutstèkskes kochdje indertiêd beej drogisteri-j Laeve inne Maasstraot of Rooyakkers inne Bieëkstraot. Dao stoonge altiêd e zjempötje oppe toeëg woeë di-j stèkskes in stoonge. Mer di-j zeen nog te koup. Vreuger zabbeldje ge d’n hieëlen daag dao-op. Ich hebtj lèst nog ’s geprebieërdj, mer ’t gedöldj neet mieër um d’r zoeë lang op te zoebele totdejje d’r, wi-j vreuger, ’n poes aan gelebberdj haatj.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 68: Oeëver pepeêre buulkes en snufpoejer verscheen eerst op MLA Stories.

Doeërgaons zoôter in de kallebèskes ouch ’n luppestift, dae beej eeder bezeuk aan ‘t plaatselikke huuske zien deenst most doon um de lupkes op kluuër te haoje. As joonges zagte: “Gieëst dich dien stifte luppe?”, woeërt det meist neet op priês gesteldj, want daovör waasj ’n te sirrejeus gedoons waat hieël krieë kwoom um de uterlikke aanblik op z’n vuurdeiligst te laote oetkaome. Manne, ge motj ’s inne gate haoje: as vröllie trök kaome vant miechele in ’n kefee zeen de lupkes völ roeëjer as vantevuuëre. Oftj kusproof es mojje zèllef oetprebieëre en soms hebbe ze ânger kluuëre. Ichzellef kus neet gaer op greûn of paars. Gelökkig hebbe allewiel de vröllie ouch ’n buuërs in eur flieske zitte.  Di-j van mich ouch. En soms betaaldj ze ounog! Ich bli-j!

Oeëti-jje zeeje dieës daag weer maegdjes met piêpekrölle. Neet dék, mer tòch. En ’t hieët wat. Ge moogtj ’t nostalgie neûme, of aojerwets, of oet d’n tiêd, mer ge motj towgaeve: ’t uigtj sjermânt. Ich zeentj gaer. Leever as di-j peêmele di-jje dieës daag tieëge-n’t liêf louptj. Mer as ich d’r aan deenk wi-jvöl moote det det vreûger mien zösters koszje um schoeën piêpekrölle te make, snap ich woeërum detze oet de moeëde geraaktj zeen. Ajje det eeder waek doeër de kapper motj laote doon, loupdje al gaw inne beejstând. De kapper rietj dan ‘ne Maseratie. D’r kwoom vreuger van-âl  beej te pas: kröliêzers of -tange, di-j heit gemaaktj woeërte oppe gaasvlam, krolspelde,  beer (???? waat jaomer!), babelotjes woeëmej dejje de piêpekrölle indrejdje. ’t Woeërt es ’n verbastering oet ’t Frâns van “Papillotte”, woeëmej ze ’n reepke stof of pepeer bedoeldje um de haor in te drejje. As vröllie zich vreuger pas haje gepermanêntj en de haor, ingedrejdj en waal, nog most druuëge, zoogdje ze nog wul ’s boeëdschappe doon met de krolspelle of babelotjes nog inne haor. Waal ’n kopdukske d’r oeëver, want dan meindje ze detj neet opveel beej de minse. Mer met meine, beschieët d’r zich eine, zagte ze vreuger al. As ’t vrawke oppe foto uut 1996, met di-j schoeën piepekrölle, zich beej mich meldj, kriegtj ’t mien book vurniks kedo. ’t Woeëndje indertiêd op ’t Indj.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 67: Piêpekrölle, trök inne moeëde? verscheen eerst op MLA Stories.

Vurbieëldje zat:

– Ge moogtj neet fietse oppe promenade. “Det börsj”, d’r es toch geine wout.
– Ge moogtj neet wîldpisse oppe straot. “Detj börsj” ich verrèk ’t um in mien bóks te zeike.
– Ge moogtj gei vét hebbe vanne dokter. “Detj börsj” en paktj vétte friet met ‘ne klodder majo.
– Ge mosj (vreûger) soondes nao de kêrk. “Detj börsj” en ge gongtj biljare beej Janes van Brussel.

Allemaol vuurbieëldje van oeës roow Wieërter taaltje.

Woeërum es ’t Wieërtlânds neet zoeë zangerig wi-j de spraok in de rest van Limburg? Ve wieëte-n ’t neet zieëker, mer de geïsolieërdje ligging van Wieërt op ‘ne hoeëgere zândrök tösse de naate Pieël en Kempe, zal dao neet vrieëmdj aan zeen. Ajje alle mèn aanne stamtaofel nao e paar pötjes beer ammaol tegeliêrtiêd huuërtj kalle, meindje det ze hoeëgloupendje ruzie hebbe. Dan gieëget d’r op! Gelökkig dékstentiêds allein mette moel. Mer ‘ne verdwaaldje Hollander verwachtj detter doeëj gaon valle. Mer de kastelein huuërtj det gaer, want völ kalle maaktj ’n druuëg kael en di-j mot gesmieërdj waere.

“Dao börszje toch van”, zag ich ouch wi-j ich ’t sluuëtelgaat ‘ne kieër neet kos vînge. Waat waas d’r gebuuërdj? Wi-jtj ‘ne kieër kejhaard storremdje, waas ich mette wîndj inne rök oeëver de singel, naeve ’t Sintjoeëzefsgebouw doeër oppe Busseng aan gewèjdj, recht beej ’t Ânker nao binne. Beej kastelein Hans van der Waard blieëf ich wachte tot de wîndj waas gaon ligke en detj doordje nogal effe. Wi-jtj uuteindelik wat minder wèjdje leep ich tieëge de wîndj in op heivers aan en haaj vanwieëge de wîndj de hieël brédje vanne stoep noeëdig. En aanne duur gekaome waas mich ’t sluutelgaat doeër de storm 10 sentemaeter opzi-j gewèjdj. Mer mien vraw gloft mich neet. Dao börszje toch van!

Schoeën wuuërd hevve in oeës taaltje. Waat tûnktj uch van dieës les in oeës mooderspraok: “Det stök vrieëte es ‘ne groeëte vrieëtzak en vrieëd op vrieëte. Dè’s toch neet te vrieëte? Mer dao esse waal vrieëd op.” Zés kieër vrieët(d) dus in ’n ânger beteikenis. Hejje-n ’t doeër?

Stök vrieëte = duuëgeneet; vrieëtzak = gulzigaerd; vrieëd op = tuk zeen op; vrieëte = aete; neet te vrieëte = neet te hebbe; vrieëd zeen op = trots zeen op. En dan nog ein: “t Es vrieëd Stien, mer éin ért inne sop en nog neet ’s gaar!“ Mer zeetj bli-j: ge hooftj dit taaltje neet aldaag te gebroêke, mer waal vri……aete.

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 66: “Börsj” zegke ze nogal gaw int Wieërts! verscheen eerst op MLA Stories.

De mieëst hèndjige jungskes (ich haaj toen nog twieë hang) mochte nao schoeëltiêd naobliêve um te kafte. Det waas ’n hieël ieër ajje daovör gesillektieërdj woeërtj. Allewiel kiekdje dao ângers tieëgenaan. Mer ’t hooftj ouch neet mieër, want leptops hooje neet te kafte. Mer aevegood, ich krieëg ’n mariabieëldj en det krieëg ’n prommenênte plaats op miên zölderkaemerke. ’t Woor oeteindelik ’t ieërste attrebuut waat ich zéllef verdeendj haaj, nondedju! Gruuëts woor ich. En dan kwoom de meimaondj. Towgewiedj aan de heilige maagd Maria, en in alle kêrreke, Moêzelkepèl en nisse in moore woeë ’n bieëldj van eur stong, woeërte bloome nieërgezatte en österkes gebaedj ter ieëre van dieës maagd di-j doeër d’n heilige Geest te graze genoeëme woor. Êrreme Sint Joeëzef! Mer inne meimaond moszje ter ieëre van slivvevrawke bloome gaon plökke um in ’n vaeske vuur ’t bieëldje te zette. En waat zoeë schoeën waas indertiêd: oeëverâl naeve de boetewieëge, aan de rèndj vanne akkers en vêldje vongdje zoeëmerbloome, zoeëvöl ajje woeëtj hebbe. Blaw koeërebloome, roeëj klaproeëze, pinksterbloome, hazeklieë, sluuëtelbloome, serél, knuipkes, zeutemeikes, klieëbloome. En oet de eige hoeëf plökdje ge kernieëlkes, kêrk-roeëze en de léste töllepe. Ammaol um slivvevraw te ieëre. ‘nen Allike maondj lang.  En inne statterkêrrek woortj alle aovendje österke-baeje met de litteni-j van Maria beej ’t opgetuûgdj maria-altaor, woeëtj börzje vanne börrendje kerskes. En laotj os ieërlik zeen: as wécht vongdje det ammaol verrékkes schoeën en dieëdje gaer aan mej. En ge zongtj kejhaard mej ”Oh moehoedermaagd, die Jeeheezus draagt, zo heerlijk aan te schouhouwen”. (Gleûrder of pin-up-girl?)

Mer ti-jje zeen verângerdj en ’t geluif hieët lieelik naogelaote. Ve hebbe gein bieëldje mieër inne kamer staon woeë ve bloome vuur nieër zette. En waat völ erger es: Woeë kujje nog inne boeteni-jje ‘ne êrm vôl vêldjbloome plökke? In ‘ne koeëren-akker zeeje gein koeërebloome mieër. En tösse de meîs gruuëtj al hieël niks ângers asze d’r geine wiet tösse poeëte. Wieëgkânte waere kort geméjdj, dus gein klaproeëze, knuipkes en sluuëtelbloome mieër. Ajje d’r oonger ’t wândele e paar zeetj, wiezje dao met de veenger nao. “Kiektj dao: ’n klaproeës!” Es det neet schrikkelik?  Oeëti-jje zejje ze “wildje” bloome oet in ‘ne bêrrem of op ‘n taluud. Mer ajje d’r dao ein van dörftj te plökke hejje metein de hieël miljeufidderasie aan eur koont hânge. “Det es neteur! Dao mojje met eur tengels vanaaf bliêve”.

Detter gein heiligebieëldje mieër inne hoêzer staon en detter gein vêldbloome mieër te plökke zeen hieët gein kloeëte met deindânger te make, mer zeen waal verschiênsele van allewiel. Det es neet trök te drèjje, neet te vervânge. Mer de nostalgie, wieëmood, memorie met ‘n wêrrem geveûl blieftj! Det kunne ze os neet aafpakke. Ich heb toês ‘n schaepke met gipse heiligebieëldjes staon. Ich val d’r neet mieër vör oppe kni-jje um te baeje, mer deenk waal aan de gelökkige tiêd toen ve nog koste gluive. “Er was eens….”, zoeë beginne sprookjes.

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 65: Meimaondj, met de bleûmkes vör de maagd verscheen eerst op MLA Stories.

Ve zeen met z’n 6 miljard en dînke d’r ammaol ângers oeëver waat os te wachte stieët nao d’n doeëd, mer neeme weitj. Ouch aanne stamtaofel zeentj ve d’r neet oeëver ins, mer hawwe os daovör de köp neet in. Mer eeder geluif pretendieërtj detj de ènnigste es dae geliêk hieët en hawdje doeër de ieëwe hieën di-j ângersgeluivinge de hèrses in. Zèllefs allewiel nog. Tachtjig presênt van alle oeërloeëge woore en zeen geluifskwesties. Waat ‘ne onzin eigelik. Geluifdjae in Allah? Nein? Kop aaf! Gluifdjae in Jézeke? Nein? Kop aaf. Boedda es zaligmakendj. Nein? Sodemietertj op! En ouch de Joede oonger aanveuring van Joshua, joôge in Jericho doêzendje jaore gelieëje al ângersgeluivige oeëver de kling. En dan dînkdje wul ‘s: “Wannieër kriegtj de minsheid oeëts verstând?”

Mistrowwe vör ângersgeluivige woeërt os met de paplieëpel ingegaeve. De broêders en zusters zooge leever neet dejje met protestântse of ongeluivige wichter spuuëldje. ’n Gemingdj huwelijk waas ’t èrregste waat dejje verkieërdj kosj doon. Leefdje spuuëldje gein rol, ajje mer ‘t zelleje geluif haadj. Spreuk vanne kêrrek: “Twieë geluive op éín kösse, dao zitj d’n duvel tösse”. En ve spaardje zûlleverpepeer um de heidenwichterkes met gewêldj te duipe um ze beej te kunne schriêve inne ledeliêst van oeës mooder de heilige roomskattelieke kêrk. En di-j kattelieke geistelikke leepe ammaol met lang zwêrte schörte. En waat dînkdje de leste jaore: âl waat kloeëte hieët oonger ‘ne toeëg mojje met ‘t groeëtste mistrowwe betrachte. Det zeen wuuërt van Twan vanne Plak (Stribos) brândwieëroôngerkommandânt in zien jaore, en dan schrief ich nog neet ’s wi-jte-n’t echt zagt. As ich boeëvestaondj vreuger oppe broêderschoeël of ’t Kleezje haaj bewieërdj, waas mich met hel en verdoemenis gedreigdj, zoeëneet al metein vanne schoeël gestamptj. Mer ich laef nog, zoonger bang te hoove zeen det ich boete de gemeinschap waer gezatte. Want det waas vreuger waal zoeë. En det d’n daeke mich geine goojen daag mieër zieët, dao ligk ich neet van wakker. Mer ge kuntj ounog altiêd doon azzof. Schötteri-jje, hermeni-jje, koeëre prizzentieëre zich met hoeëgti-jdaag op ‘t gdróbbel inne kêrk. Det hieët gein kloeëte met geluif te make, want doeër ’t jaor hieën kojje ze dao noeëts tieëge. Sinte Ketrien es dao bedrieëve in. En de Rogstaekers brînge worste nao de nonnekes vör good waer. Gaotj di-j worste astebleef dit jaor trök hale!

© Frits Weerts / Bullseye Publishing

Boek Stamtäöfelke kopen                               
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 64: Wildjae nao d’n hieëmel? verscheen eerst op MLA Stories.

Schötteri-j Sint Job gong op ziêne jaorlikse tieërdaag-met-jaorvergadering gemeinlik nao Mina vanne Kowstal. Gewuuëndje waas dan ouch detter piepkuuëkes gesmausj woeërte. ’t Gebuuërdje op ein van de jaorvergaderinge detter oonger de roondvraog de vraog gesteldj woeërt, of de piepkuukes neet te völ aroma van de boutkiet op zoeëje neeme, want de kuuëke loog d’r nogal dóchtbeej. Hub vanne Bökkem (Bukkems) waas d’r beej en verteldje ’t os oppe stamtaofel.

Zoeën kefee zoeëj mette riggelemênte van allewiel neet mieër kunne en moge bestaon. Woeëje eur koetje oppe groond kosj oettraeje en nao boete mosj um te miechele. Woeë de segare- en segrettewâllem as ’n wôllek inne gelagkamer hong, en ’t roeëk nao zjenaever (vanne mèn) en odeklonje (vanne vröllie). Mer aevezieër doeëdzundj en jaomer det ve dae sfeer neet mieër kunne mejmake. En d’n tiêd es zoeëwiêt gekaome det de kastelein neet mieër kan akkedieëre van allein mer e peelske en ‘ne aoje klaore. Allewiel motte d’r zieëker tieën soeërte beer getaptj waere en ounog wat te aete d’r beej. En weem vanne jong of aojer vröllie hieët nog ’n fleske odeklonje in ziên tasje? As wècht zeendje weit ich nog duvels good det miên mooder mich ‘ne tesneuzik met e paar dröppelkes odeklonje oonger mien naas doedje as ich oôzelèchtig waas. Det haaj ze toezjoer bi-j zich in eur kallevlieske. En ’t heêlep! In det tasje zoot meistens ouch nog ’t österke (det moszje altiêd bi-j uch hebbe!) en ’n rölke paepermûnt vör as de mins wat völ gepreûftj haaj en nao d’n drânk roeëk. Mer dae odeklonje zoeëj dus beej de Kowstâl good van pas zeen gekaome. Aant österke haadje dao minder. Ave Maria gratia plena.

© Frits Weerts / Bullseye Publishing

Boek Stamtäöfelke kopen                               
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 63: Vanne Kowstâl en Odeklonje verscheen eerst op MLA Stories.

© Frits Weerts / Bullseye Publishing

Boek Stamtäöfelke kopen                               
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 62: Wi-jzoeë wêrrem? verscheen eerst op MLA Stories.

Aan de klei-jer di-j ze aan hebbe kujje zeen det ze dao-in eur laeve lang hebbe motte motte poejakke. Asj ’n kluuërefoto waas, koszje zeen det de keele blaw woore, zjuust zoeë blaw as de boorekeel dae ve noow nog mer allein nao’t boorebâl aandoon. Inne blawvêrveri-j woeërte di-j gekluuërdj met ’n aaftreksek van meekrap. In Wieërt gebuuërdje det hieël vreûger in ’t pand “’t Blauwe Schaep”, naeve ’t aod stadhoês oppe Mêrrentj. De gaevelstein boeëve inne moor deût dao nog aan dînke. Vanne blaar van de meekrap (wede) woeërt de blaw kluuëstof gemaaktj. Neet êrreg fris, want dao kwoom völ urinezoor (gewoeëne minselikke pis) aan te pas. Saoterdes woeërte te stoffe dao-in te weike gezatte en smaondjes hoonge ze de blaw lappe te druuëge. Dae-n daag koste de blawvêrvers dus neet wêrreke. En dao keûmtj de naam “Blawwe maondjig” vanaaf. En neet, waat völ minse meine, dejje dan uut mosj röste van vuurgaondje zoondig en de alkoholspeegel langzaam mosj aafbawwe. In ’n presèsverbaal van vreuger stieët beschrieëve det di-j ververi-j stoonk wi-j ’n boutkiet (neet gek neteûrlik) en det de oongergrondse bieëk di-j d’r langs leep dék verstoptj waas. Mer dao zal ’t openbaar sekreet (schiêthoês) naeve de kêrktoeëre, waat oppe zelleje bieëk oetkwoom, ouch neet vrieëmdj aan zeen gewaesj.

Mer de boore mènnekes oppe foto dieëje allein soondes asze de nao hoeëmes gînge eur soondes pak aan. En altiêd oppe klûmp. Det trooj zich baeter oppe-n akker en inne wej. Ge mosj d’r allein neet te haard op renne, want dan haadje groeëte kâns dejje uch harînkeldje. En det dieëj verrèkkesse pien! Det keûmtj awiel neet zoeë dék mieër vuuër, want oeës molie-jaerkes zeen neet zoeë haard as de kannedassehoutere klûmp van toen. Op wieëg nao hoês, nàò de hoeëmes, waas de kâns op harînkele ’t groeëtst, ajje teminste, wi-j zich det toen huuërdje, e paar eurkes beej ’t Broen Paerd (woeë ésj geblieëve nondedju!) haatj gezaete. Met lichte stèpkes en ‘ne zwaore kop op heivers aan traeje kos vör det ongemaak de oeërzaak zeen. En det waas neet mis, want ge stoeëdje eur înkels kepot detj bloodje en dan blieëve de zök aanne wong plèkke. Oppendoor kwoom d’r ’n ruuëfke op, en det stoeëdje ge d’r eeders kieër weer vanaaf en dan bloodje ge weer as e vêrreke. Op di-j memênte es slivvenhieër déks in krachtige taal aangeroôpe, det kân ich uch zegke! En det waas gein geschikdje taal vör nonne-uuërkes, ofschoeën di-j slivvenhieër ouch um d’n haverklap aanspraeke. Mer ângers.

Soondes dieëje de manskaerels nao de kêrk zwèrtgelakdje klump aan. Det stong sjieker beej ’t pak. Oppe-n akker droôge ze ongevèrfde. Det kujje met eur klûmp aanveûle!

© Frits Weerts / Bullseye Publishing

Boek Stamtäöfelke kopen                               
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.we

Het bericht Stamtäöfelkes aflevering 61: Harînkele verscheen eerst op MLA Stories.

Dae verteldje nog wat schoeëns oet dae eksternestudiezaal, waat ichzelf ouch belaefdj heb. Dae zaal zoot herstikke vôl met stadseksterne di-j verplichtj nao de studie moste kaome van 5 wis hallef 8. Umdetter te weinig plaats woor, woeërte de klaslokale d’r naeve ouch vör de studie gebroêktj. Dao zoodje fein boete ’t zicht van de survei-jânt, waat nogal wat muuëgelikhede oeëpendje. De rame van di-j klèskes kieëke oet op de pas aangelagdje Nowwe Mêrrentj en dao loog aanne ângere kânt de bekindje snèkbar “Bon Apetit”. Vae baedje waal eedere daag “Heer, leidt ons niet in bekoring”, mer dao woore ve toch neet tieëgenop gewasse. Hup, de raam oet, vlot oeëver d’n draod geklomme en drieë oppe friet en frikedelle aaf. Oppe trökwieëg de buit effe doeërgaeve aan de studieköp inne klas vuurdejje weer trök d’n draod oeëver klomtj. Smulle mer! As prefesser Nabben deenst haaj, leete zich waal ‘s ontvalle: “Ik ruik frikandellen”, mer det goof niks, want hae waas toen al tezegkes blîndj en zoog neet wi-j vae in ’t geniep zoôte te smauze.

As stadsekstern moszje oeëti-jje boeëdschappe doon vör de interne di-j de kampus neet mochte verlaote. Klasgenoeët Ben Segers en ich ginge oonger ’t spuuëlkerteer altiêd toês effe ’n segret rouke. Oeës mooder raekendje dao-op en haaj de koffie klaor staon. Déks moste ve dan vör d’n ein-of-ângere intern ’n vlaetje of ’n ons kermèls mejbreenge van bakker Zjef van Giel (Nouwen) inne Muuëlestraot. Di-j kloeëdje ve dan mieëstâl doeër ’n döbbeltje oppe pries te zette, want di-j riêke-minse-zuuënkes haaje toch soondesênte zat. Mars waas ouch hieël êrreg in trek, mer dao koste ve niks op verdeene.

Wi-j ve later inne groeëte studiezaal zoôte, kwoom ich ’n tiedje naeve de toen nog onbekindje Joost Prinsen te zitte. Dao most ich ’n pötje pindakieës of sjekladepasta mejbreenge. Dao zoôte dan oonger de studie met ziêne vînger oet te lèkke. Dae vétkanis!

Eíne smieërboel waasj. DAO HAAJ ICH ’N FOTO VAN WILLE HEBBE. Ich gluif neet detter in ziên schrifte ein bladzijde woor di-j neet met înk bekladj woor. Ve schrieëve toen nog ammaol met de vulpen. En allein al ’t völle van zoeë-n pen met rubber zèkske waas al ’n kûnst op zich. Op alle houtere bênk inne klasse en studiezal zoôte dan ouch înkvlèkke di-j d’r noeëts mieër oetgînge. Hieël generasies hebbe aan di-j abstrakte schilderèchtige taferele mejgewêrrektj. Al dan neet bewusj.

© Frits Weerts / Bullseye Publishing

Boek Stamtäöfelke kopen                               
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 60: Verhaole uut de studiezaal verscheen eerst op MLA Stories.

Mer as ich dao oeëts bin, schutj mich tebinne wi-j ‘t dao vreuger towging. Kloeëster Maria-Hart inne Maasstraot waas indertiêd ’n pauselik slot, waat inheel detter streng regels golde vör de nonnekes di-j daobinne laefdje. Ze kwoome allein mer boete um nao d’n tandarts te gaon en te gaon stumme in ‘t aod stadhoês oppe Mêrrentj. En noeëts allein! En met ’n vuuëlke vör de auge. De hieël kloeëstergemeinschap ging in ganzepas doeër ’t daeke-stieëgske naeve de kêrrek op nao ’t stadhoês um te stumme. ’n Köstelik gezicht, woeë ouch nog fotoos van zeen. Mer ze veerdje waal Sinterklaos! Jaorelânk waas Leike de Borgie de Sinterklaos van Vinsênsius en ich waas Zwêrte Piet as ve kedootjes beej de nonnekes mochte brînge. Toen nog zoonger diskriminasie!

Ge woeërtj doeër Drina, de hoêshaodster, binne gelaote in de ontvangkamer. Achter ’n houtere loêk van ‘ne maeter of twieë breid en eine hoeëg, huuërdje ge wat gemummel en vör de rest waasj stil. Tot ’t loêk oeëpe ging!!!!! D’n ieërste kieër det ich det zoog, schrok ich mich kepot. Achter det loêk woore twieë ruuësters van dikke tralies di-j zoeëwiêt uutein stoonge dejje met eur hand de twieëdje tralie neet kosj aanrake. En dao-achter stoong ‘n klocht nonnekes, di-jje dus gein hand kosj gaeve. Ge kosj allein de köpkes met det apaart kèpke ontware. De snuutjes woore amper te oongerschei-je.

En dan begoste di-j zusterkes ’n sinterklaoslidje te kwele waat ich nog noeëts gehuuërdj haaj, mer zieëker van vuur WOI woor. Leike kindje ’n paar nonnekes van naam di-j van Wieërt vandan woore en dao kaldje hae dan plat tieëge. Gegiechel wi-j ’n schoeëklas jong pölle. Mejjèh, Sinterklaos mot toch kedootjes gaeve? Di-j koszje onmuuëgelik doeër di-j tralies gefroemeltj kriêge. Dao haaje ze wat op gevoonge. Oonger ’t traliewêrreke woor ’n schuuflaaj ingebawdj. Ajje di-j nao uch tow troktj, koszje dao ’t kedootje inlegke en trok moôder abdis de laaj nao zich tow en pakdje ’t d’r oet aan d’n ângere kant van ’t Iêzere gerdien. Déks waasj ’n reep sjeklaat of e pèkske speklasie. Of èppelkes en paerkes van marsepein. Niks van ‘n likeurtje, sjerrieke, fleske wiên of zoeëwat. Ve hebbe waal ’s tandebörstels (schoeën verpaktj in sinterklaospepeer) doeër de laaj geschoeëve, want dao haaje ze um gevraogdj. Di-j zusterkes verrèkdje ouch nog vanne êrremooj. AOW bestong toen nog neet. Mer âl waat ze haaje waas gemeinschappelijk bezit, zag moôder abdis. En di-j tandebörstels dan?

© Frits Weerts / Bullseye Publishing

Boek Stamtäöfelke kopen                               
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 59: Lourdesgrotte verscheen eerst op MLA Stories.

© Frits Weerts / Bullseye Publishing

Boek Stamtäöfelke kopen                               
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 58: ‘t Kwezelke verscheen eerst op MLA Stories.

Mer um neet hieël Bosseve oonger water te zette, moste ze ’n diêkske bawwe det ’t water dao haeroppes tieëge heel. Det diêkske ligktjer allewiel nog. Allein esj jaomer detj noeëts gebroêktj es, want de Pruuse kwoome achterum oeëver Bêls. Achterum esj kêrremes zulle ze gedachtj hebbe en kwoome met druuëg veût hi-jjeroppes. Toen ze aerd noeëdig haaje um det diêkske aan te legke ontstong dao ’n vin-ke. Met klaor en zuuver groondwater, woeë vae as wichter dék in gînge roondspèrtele en kuite inne gaele zând. En dao kwoom zêldje of noeëts eeme. Dus waas det de oetgezochdje plek um met eur leef oppe zoondigenaomiddeg naotow te fietse, uch dao langs d’n diêk tösse de struukskes trök te trekke en doon, waat verleefdje ammaol ammèr doon.

In de jaore fieftig vanne vuuërige ieëw bestong in Wieërt de Wieërter Vliegclub en di-j joonges bawdje zweefvliegtuigskes oet balsahout, plèksel en dun pepeer.

Oppe foto zeeje di-j klup op, en op wieëg nao, de Bosseverhèj um di-j zweefdînger op te laote en ze röste effe oet beej ‘n kazemat di-j toen nog naeve de knaal stông. ’t Waas ’n prachtige sport, allein, asj good ging en det vleegtuugske blieëf lang inne locht, moszje det kielemaeters achternao renne umtj trök te kriêge. Det oeëeverkwoom mich ‘ne kieër en miên toestèlke vloeëg oeëver de hieël hej richting boeëvebeschrieëve diêkske. En ich d’r achterhaer. Zjuust achter ‘t diêkske blieëf ’t apperaat in ‘ne boum hange. Hèh! Gelökkig! Ich zat mich effe um op aom te kaome en toen veel mich wat op. E bitje wi-jjer waas einige bewieëging in ‘t struweel en wi-j ich good kieëk woeërt ich twieë minse van verschillendje kunne gewaar. En di-j looge dao obbein! “Kîh”, dacht ich toen. “Det es woeë prefesserke Joske Jansen van ’t kleezje (as leek op det gebied) doeëd en verdêrf oeëver preekdje”. De duûvels lekker verleiding zitj in ’n klein hukske. In dit gevâl achter ’n klein diêkse. Ich heb mich stillekes trökgetrokke en ze laote doon woeë ze mej bieëzig woore. Trök beej miên vreende vanne vleegklup heb ich ze daen daag nog niks gezâgdj, want ich deenk det ângers de hieël bups danaotow gegaloppieërdj zoeëj zeen. En ich dacht beej m’n eige det ich de neteur ziêne gânk most laote gaon.

Det wiêt en haard achter eur vleegtuugske aanloupe waas later neet mieër noeëdig, toen ve oetgevoonge haaje wi-j ve ’t dînk neet langer as drej minute koste laote vleege.

Daorum heb ich noeëts mieër achter ’t diêkske gekieëke. Jaomer!

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 57: Vleege oeëver d’n diêk verscheen eerst op MLA Stories.

Det waas in miêne tiêd (1958) toch ângers. Vör waalgeteldj achtenvieërtig göldjes (dès allewiel € 21,60 !) haaldje ich det onmisbaar pepeerke en ich weit neet mieër of ich 6 lesse van 8 euro heb gatj, of 8 lessen van 6 euro. Mer dè’s um ’t aeve. Ich mos waal mien theorie oeëverdoon beej meister Koenders, d’n eksaminator, want ich haaj neet dèkzat in det bukske gekieëke woeë alle regelkes in stônge. Det kosje mich waal 2,50 ekstra in ‘ne tiêd det ’n pekske Caballero van 25 stöks 80 sênt koszje. Ich weit ouch neet mieër oftj beej De Boeëj, Baetsen, ofAlleman waas woeëvan ich ri-jles krieëg.

Ri-jschoeël De Boeëj hoot zoeë, umdet de eigenaar ‘ne gewieëze plies waas en dao zegke ze op z’n plat Wieërts boeëj tieëge. Jan van Neelkes Jaan (Baetsen) woor noog wiêt vuur ‘d’n oeërlog breefdrieëger 1^e klas en goof um wat beej te verdeene ri-jles beej Driek vanne Frênk (Frenken) oppe Kêrkstraot. Dae verkocht autoos en um di-j te koupe mozje det bewiês hebbe, dus begosse zellef mer ’n ri-jschoeël um klânte te winne. Di-j schoeël noome later oeëver en toen waasj Ri-jschoeël Baetsen. Z’n zuuëns Wim en Ad moste al metein ri-jles gaon gaeve toen ze âmper twieë daag zelf ’n ri-jbewiês haaje. Allewiel onvuurstelbaar! Völ Wieërter hebbe beej eur de kûnst van gaas gaeve, remme en achteruut parkieëre gelieërdj. En hellingske trekke oppe spoeërbêrg. En vergaetj verdoeërie neet te sjooke!!!!!! Oppe foto zeeje de ieërste leswages van Baetsen. Di-j haaje nog ’n “P” oppe nummerplaat staon en det beteikendje toendertiêd detze oet de provinsie Limburg kwoome. Plimburg zagte vae as wichter. Mer waat vör ’n mêrrek auto es dae-n ieërste? Oongeraan stieët Ad beej d’n Opel.

Gekke vuurvalle blieëve neet oet. Zoeë wi-j ‘ne lieërling dae vuur d’n oeëverwieëg most wachte. Toen d’n trein vuurbeej waas, de buim weer oeëpe en ’t roeëd knipperlîcht oet, rieëje neet wieter. “Woeërum gaoje neet wi-jjer?” waas de vraog. ”Ich wacht op ’t greun lîcht” zache. En zoeën Tonnie van distilieërder Stang Mathijsen oet de Maasstraot waas ’n kerteer te vreug beej de Tramhalt vör zien ri-j-eksame. Toen pajje hae zich oongertösse mer ’n peelske. Toen d’n eksaminator ‘m kwoom hale, zag hae “Wach effe, ich mot ieërst m’n pîlske lieëgdrînke”. En toene trök kwoom, woore ounoch geslaagdj ounoch! Vandaag d’n daag zoeëdje heejmej al geflatsj zeen vuurdejje op eksame gongtj.

Mer völ joonges in dae-n tiêd haaje al hieël wat kielemaeters gerieëje in d’n aoto van pap, of ‘ne oeëme vuurdet ze les krieëge. Op stil wieëge, boetenaaf, zoeëdet ze al wiste wi-jtj gong vuurdet ze inne ri-jkûnst oongerwieëze woeërte.

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 56: Autori-jje verscheen eerst op MLA Stories.

Tumtum woor ‘ne lange magere mins en hieët zich ‘ne kieër van onmacht vuur de klas zoeë op staon te riête met traone inne ouge, det “De Nek” (prefesser Jochems) dae in de klas daonaeve Pruusies stong te gaeve , de orde most kaome herstelle. Zjenânt vör ’t ménke. Ich heb nog ’n foto van ‘m woeë-op oeës klas met hem op ’t sportvêldj stieët. Dae haaj noeëts lieëraar motte waere.

En gluif mer neet detter allein opt kleezje gekuitj woeërt. Oppe MULO aanne Emmasingel koste ze d’r ouch wat van. Beruchtj woore de kuiteri-jje in de klas van Koetje (beejnaam van meister Linnartz). Det ménke hebbe ze ‘ne kieër beej z’n revaers gepaktj en aan ziêne jassekraag inne gângk aanne kapstok gehânge. Schoeëlbaas van Rens mos d’r aan te pas kaome um ‘m oet di-j ongemaekelikke posisie te bevri-jje. Waat ‘n allegasie! Mén di-j awiel tieëge de tachtjig loupe en d’r beej woore, zitte zich nog te verknuuëkele asse ’t zich vuur de geist hale.

Mer aevezieër zundj ajje as krek oeëvevörs gewiedj preesterke, uch ‘n gezeingeldj preesterlaeve vuursteltj, en dan vör de lieëwe waertj gegoesj as survei-jânt in de eksterne-studiezaal. Woeë ze uch koe-jenieëre en tempeëste tot de schrik uch inne ouge stieët. Jong kunne vrieëd zeen. Bloodjoonk preesterke Beckers oeëverkwoom dit. Ich weit neet woeëte later geblieëve-n es, mer hae haaj baeter vuurbaejer in ’n nonnekloeëster kunne waere. En allein ‘soondes, dan zeen di-j op z’n braafst.

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 55: Kuit-inne-klas verscheen eerst op MLA Stories.

Legendaries es ’t verhaol van de smokkelaer met ’n fles zjenaever, dae doeër ‘ne kommies betraptj woeërt. Dae prebieërdje de fles inne gawwigheit lieëg te zoêpe um ’t bewiês weg te foezele, mer det krieëge mer half klaor. Toen woeërte-n ‘m drej presesse oonger z’n naas gedoedj. Ein vör poging tot smokkel van verboeëje waar, ein um ’t bewiês te verdonkeremane en de dêrdje vör oeëpelikke zatigheid. Tjuuse pech, mer waal e tikkelke aangeschoeëte.

Völ Wieërter en Roojer minse hebbe tösse de oeërloeëge wul ‘s ‘ne daag of wat beejde plies doeërgebrachtj. Oeëti-jje waasj aafgesproeëke wêrrek. Van ’n smokkelgruupke leet d’r zich eine kwansiês, wi-jtj van te vuuëre bekoonkeltj woor, doeër de kemies vânge en hieël dae aanne kâl. Oongertösse kost de rest vanne bups ongestuuërdj met zèk boeëter op eure nek nao Bêls oeëverstaeke en brachte as ze trök kwoome zèk vôl zaot mej. Döbbel winst, woeë ouch de arrestânt in mejdeildje. Det lökdje dék umdet d’r völ minder kemieze woore as smokkelers. En nao sókker waas ouch groeëte vraog. Van Bêls op os aan. Met wat gést en water en ’n klandestien installasie koszje dao pure jajem van stoeëke, dae in ’t druuëgelagdj bêls vör groeëf gêldj vanne hând ging. Tot inne jaore nuuëgentjig waas det, dèks boetenaaf in ’n boorescheûr, ’n bieëzigheid woeëje de buurs dik mej kosj spekke. En ’t gong déks met doezendje liters tegeliêk. De mieëste di-j daobeej gesnaptj woeërte looge stroontzaat naeve de stoeëkkieëtel te snörreke. Beroepsriziko neume ze zoeëwat. Vör al di-j “hieëredelikte” waas d’r aan wieërskânt vanne breer völ begrip. En ajje inins ’n vrawke van sumpele komaaf met ’n gouwe ketting zoogtj loupe, koszje uch al deenke wi-jtj zoeëwiêt gekaome waas. (Asj ’t teminste neet horizontaal verdeendj haaj)

‘ne Nötte mer ieërlikke kemmies waas in dae-n tiêd Brigadier Tak. Dae goof d’r niks um, um ‘ne nacht inne bieëk te ligke um ‘ne struiper of smokkelaar beej z’n kladde te pakke.

Mer asze ‘m te graze haaj, waasse d’r waal mej gezaegendj, want wi-j krieëg hae dae op ’t pliesieburo aan? Zoeë pakdje hae ’s oeëts herrieschöpper Tinus van Kei-jese Mies beej z’n lörreve in kefee de Kowstal. Dae sleipdje hae drej kielemaeters wiêt nao ’t pliesieburo, umdet Tinus verrèkdje um te loupe. Drej kieër vrooge ‘m “Wildje loupe?”. “Sleipe”, zagt Tinus. En op ’t buro koste ze de keezere uut zien kont puuëtere.

Tak hieëtj zèllef geschrieëve in ziên verbaal.

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 54: Smokkele en stoeëke verscheen eerst op MLA Stories.

De mieëste joonges oet oeës kontri-jje di-j in de jaore ’50 vanne vuuërige ieëw in deenst moste wiste âmper waat eur oeëverkwoom. Ze leepe vanaaf de schöllek van mooder en de schörte vanne geistelikheid boem-paaf de kezêrneport binne. Ze krieëge ’n” Ieërste Griês” (toen ’t tenue vanne seldaote) aangemaete en kwoome d’r achter det de neet kattelieke joonges, di-j ze ieër met de noeëdige presómsie moste bekieke, ouch minse woore di-j gewoeën aomhaaldje en en woeëje mej kosj kalle. En met ‘tzelleje achtergedacht bekieëke de prottestânte di-j paapse aanhângers. Mer al gaw veêle de schèlle van eur ouge en koszje met allemân oeëverwieëg.

D’r leepe d’r in zoeë-n kezêrne roond di-j ’n bêlkske, stèrke of streepke op eure schouwer haaje en di-j moszje gooje-n daag zegke doeër met eur vînger tieëge eur pet te tikke en oongertösse moszje ‘m aankieke. Det woordje eiges neet gewintj. En ge kindje dae vênt toch hieël neet? Ze lieërdje uch det det eure mieërdere woor en dejje dao tieëgenop mosj kieke. Nondedju, det waas hieël wat ângers as ‘ne zwèrtgerokdje keplaon woeëje nederig eure kop mosj buige ajje ‘m tieëge kwoomtj. Neet detse in deenst niks aant geluif dieëje. Ajje bevuurbieëldj met Körsemus oppe kezêrne zootj beej de parate hap, marsjieërde ge in kolonne en in rotte van veer aaf nao de Nachtmès inne garnizoenskêrk. Vrede op aarde, dus zoonger gewieër, hêlm en gaasmasker. Det waal dus.

In Hollendj waas bliêkbaar gein plaats zat um ’n groeëte manäöver te haoje en dus verkazje ze ’n alikkke divisie nao La Courtine in Frankriêk. Op trökwieëg van La Courtine op Hollendj aan in 1960, woeërte de kattelieke seldaote op 1 November (Allerheilige, dus Hoeëge Zoondig!), doeër d’n aalmoezenier getraktieërdj op ’n hoeëgmès inne oeëpe locht op ‘t kezêrneterrein van Bourges. ’t Neetzeldje beej 5 graad boeëve nul. Aant indj vanne mès waas drèjkwaart van ’t geluivig seldaotevôllek wul aan ziên geluif gaon twiêfele want ze zoote ammaol inne kantien te ri-jjerre. En det ondanks de pikânte bezeûndjerheid det op ’t kezêrneterrein, ’n tikkelke wi-jjer as woeë vae de mès volgdje, ’n bordeel waas woeë de Frânse seldaote (legionaere?) in en oet leepe. Völ intressânter as de mès! Ge kosj eure’n aandacht meulik beej d’n altaor haoje. De kâl gong roond det di-j legionaere 10-ritte-kaartjes koste koupe.

Vanuut La Courtine waas d’r ‘ne laevendjige sluikhândel in Moulinex-apparatuur di-j met plunjezakke vôl op d’n heimat aangînge. Det spul waas dao de helft goojekouper. Koffiemuuëlkes, mikserkes, saappörskes, haordruuëgerkes en det spul. Meinige aafzwjèjer is d’n houwelikse staat ingegânge met apperaatjes uut La Courtine.

Dus zoeë slecht waasj in deenst neet. Ge aotj op oefening waal de helft vanne Bieëgdjerhej of de Veluwe op ajje in de tiegersluipgângk doeër de gaele zândj schraveldje, mer toendje dao later gongtj wândele blieëk dejje toch nog wat haatj laote ligke.

Mer jèh. Hieët det kaerels van oeës stamtaofelgaste gemaaktj? Dao gaon ve ’t oeëver hebbe beej ’n pötje beer.

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 53: Deensttiêd verscheen eerst op MLA Stories.

Zoeë zeen d’r nog völ mieër.

Weem woor d’n ieërste “Hèj-Geurt” en woeërum? Beej Stroeëp-Driek en Petrols-Pietje kan ich mich wat vuurstelle. Maker/handelaar en stroeëp en petrol. Mer wannieër? ’t Zoeëj toch schoeën zeen as ve det aanne hiestorie van Wieërt kunne towveûge.

Deks zeen beejname hieël duudelik. De Roeëje Matjeu (Kneepkens) zâl wul veûrroeëj haor hebbe gatj. Jao? Vreuger zooter ’n ménke met veurroeëj haor beej mich inne klas, mer dae neumdje ze toês: “Dae Blawwe van os”. En de “Witte van Metten” es allang neet wit mieër, mer de naam blieftj. Ich heb mich laote vertelle det “Söpke” (van Lierop) ieër sop roondeildje inne kezêrne (of êrreges ângers?) en noow hétj de hieël femiêlie “di-j van Söpke”. En wi-j ich nog ’n snoeëterkuûk waas, huuërdje ich al kalle oeëver di-j vanne “Gekke Nel”. Dé’s dik sieëventjig jaor gelieëje, dus di-j Nel zal wul neët mieër laeve. Mer waal femiêlie? Wi-j es dae naam ontstânge?

Nog ‘ne bekindjeWieërter femiêlie-beejnaam: De Kissert (Brankaert). Dae waas daakdekker en dieëj betuum op ’t daak, mer wannieër waas d’n tèr heit zat om op ’t daak te smieëre? Det waas hieël hèndjig: ajje d’r op kiszje en ’t siszje, waas d’n tèr heitzat. Toen waas de beejnaam geboeëre. Van Sjeng vanne Kissert weûrtj aanne stamtaofel verteltj dette ‘m nogal’s gaer haaj (weem neet trouwes?) en asze dan saoves laat toês nao boeëve geschraveldj waas, gonge pisse vanaaf ’t plat daak. Det waas zoeë z’n gewuuëndje. Op ‘ne kieër toentj weer zoeëwiêt woor, vroog zien vraw vanuut ’t bed “Sjeng waat vör waer èsj?” “Tjèh”, zagge, “’t Es stil van wîndj en êrreg doonkel”. Later blieêk dette de inne klei-jerkâst haaj staon te zeike. Inne Remundsje gezèt, de tante Bet ofwaal de Nieuwe Koerier, later de Maas- en Roerbode, stong int begîn vanne oeërlog ’n vrieëmdj bericht: “Driek is dood, is dood”.

Zoeëj dae twieë kieër zeen gaon hemele? Jummig, nein, det kân neet. Waat bieëk: dae mins hoot van z’n eiges Piet en waas ‘ne sjachelaar oet ‘t Braobentsje. Hae reizje dus as täöt stieëj, dörrepe en boeteni-j aaf met zien waar. As de wichter ‘m zooge zagte ze altiêd hieël vruntelik “Dag Driek”, tieëge-n-m. Woeë-op hae ouch hieël vruntelik stieëvâst zagt: “Ik ben Piet, Driek is dood”.  ’t Waas eeders kieër ‘tzelleje lidje. En zoeë krieëg hae de beejnaam: “Driekèsdoeëd”. Ze hebbe-n-m nao de inval vanne Pruusse gevoonge aanne Beesterbrök. Per ongelök doeëdgeschoeëte. En oonger dae beejnaam waasse bekindj en kwoome inne gezet. Mer eigelik zeuke ve de oeërsprong van femiêlie-beejname. Weem weiter wat vàn?

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 52: Wots inne neem? (Sjeekspier) verscheen eerst op MLA Stories.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 51: Met ‘n mókkelke op eure kni-j verscheen eerst op MLA Stories.

Wullemke Smeets, d’n êrreme kloeët,
Vong op dieës plaats inins d’n doeëd.
Midde in ’t Wieërter Bos
Leet ’t laeve hem plots los.
Al zeûkendj hebbe ze-n-um gevoonge
En leëte ’n träönke wi-j ze bi-j ‘m stoonge.
’n Kruuske seertj sindsdeen dae plek
Woeë völ minse langs kwaome, dék.

Wullemke es allang beej Slivvenhieër
Want elke passânt baedj eêders kieër
Vanaaf 1916 tot in dieëzen tiêd:
“Hieër, schêldj ‘m al z’n schöldje kwiêt”.
Daorum esj neet gek, int bos te stêrreve
Um zoeë d’ieëw’ge zaligheid te verwêrreve?

Mer in ’t Wieërter bos (waat in Ni-jwieërt ligktj!) es mieër historie te vînge. Waat dînkdje van ’t pieëlke van Potdommes Pier? Ich wandeldje met ziêne kleinzoeën, Hârrie van Toeën van Potdommes Pier (Timmermans) jaore gelieëje doeër de Wieërter bos toen hae zagt: “Heej dieëj miên opa puûst oet”.  En later aanne stamtaofel wiste ze dao ouch vanaaf. De minse goonge indertiêd de bosse in um van eikebuim takke te zaege vör ‘ne schöppestieël, de greesel of de schoefel, of vör de geit aan d’n tujjer. En ajje ‘ne lange aantroftj: vör de spinnejieëger.  Haadje d’r völ, dan koszje de wej d’r mej aafzette. Klein takke woeërte tot mötterte geboonge woeë ze ’t bakkes mej stoeëkdje. Eike-hakhout zagte ze. Mer de puûst van di-j buim wore indertiêd ‘ne enerzjiebron van jewelste. Dao stoeëkdje ge de kwizzenjaer en de stoeëf mej. Mer ge mosj ze waal oet d’n êrd zeen te wuistere. Met de schöp moszje roontelum zoeë deep grave dejje met de groeëte haaks aanne zi-jwortels kosj kaome um ze doeër te hakke. Ajje det gedaon haatj moszje gaon vrikke tot de poêst gong wiggele. En ajje dao ‘ne komaaf aan haadj, moszje um nog oppe kér zeen te kriêge en ‘m op hoês aan te vare. Dan woordje ‘ne halve daag wieter!  Mer toês woordje nog neet klaor. Wi-j krieje dae poongel zoeë klein dejje-n ‘m inne stoeëf kriegtj? Ieërst met de haaks in groeëf stökke en dan mette hieëp tot knep. En det dieëj dae Pier. En hae waas neet de ennigste. Ajje uch troetj um inne Wieërterbos doeër alle struuk hieën te schravele zoonger te stroêkele, dan kojje oeëveral klein koêle tieëge, deks al towgegruudj met duuvelsklaw of brieëme woeë detze vreuger puûst oetgedaon hebbe. En zoeë voonge vae, Harrie en ich, nao dik hoongert jaor, ‘t pieëlke van de poêst van Potdommes Pier. Dé’s toch ouch geschiedenis??????

Het bericht Stamtäöfelkes aflevering 50: ’t Kruûske int bos verscheen eerst op MLA Stories.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 49: Met ’t kuuske oppe-n êrrem heivers verscheen eerst op MLA Stories.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 48: Lieëg water verscheen eerst op MLA Stories.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 47: Aoj Wieërtenare verscheen eerst op MLA Stories.