Stamtäöfelkes aflevering 85: Zoeëdje nog oeëts kunne schaatse oppe knaal?

Foto GAW “Schaatse oppe knaal umtreentj 1956.”

Det es nondedjuus lang gelieëje dejje kosj schaatse oppe knaal. Mich huuëget nog det ich oeëts op sloes vieftieën aan geschaatstj bin, mer toen zoot ik nog opt kleezje en det es toch zoeë-n viefenzestig jaor gelieëje. Gemaekelik gong det trouwes neet, want de schieëp haaje zo lang muuëgelik doeërgevare, totdet ’t iês te dik woeërt um kepot te vare. Dus loôge d’r völ vastgevroeëre scholle op ’t iês woeëje eeders kieër umhieen mosj schaatse. Oeëti-jje moszje dao-oeëverhaer klune. Es dao ’n Wieërter woeërd vör?

Oppe Noeërdervaart koszje altiêd al ieërder oppe iêzers roonddarre. Dao woeërt weinig gevare en di-j ligktj hieël inne vlaake, woeë de kaoj d’r baeter áán kan en dus vruusj ze ieërder tow.  Fein glaad iês wis hieël aan Beringe. Mer op âl di-j kielemaeters loog mer éin kefee: De Stoep aanne Meyelse brök. En det es vör ameteurs aanne krieëje kânt.

Vae blieëve dus leêver schaatse oppe knaal vanne statterbrök wis aan sloes zestieën. Dan koszje oongerwieëges nog effe oetröste beej Zjang van Wieke Graadje (Tullemans), Zjaak vanne Kuper (vd Schoor), Tieske vanne Hejgeurt (Vaessen) en beej de Boskrèj (van Leuken) amaol kefees naeve de knaal en aant indj haadje nog De Krim (Kremers). Det maakdje de trökwieëg d’r neet gemaekelikker op, mer waal plezeeriger.

Ge mosj allein neet tekort beej de schieëp kaome di-j dao aafgemeerdj woore, want di-j schippers heële, bang vör ’t kepotvreeze, de kant van eûr schieëp iêsvreej doeër met ’n haaks ’t iês kepot te hawwe.  Op zich neet zoeë-n prebleem, want ajje dao per ongelök inne buurt kwoomt, leepdje hoeëgoet éine naate siek op. Roontelum waas ’t iêes dik zat um uch te haoje.

Kûnstschaatse wi-j vae di-j allewiel kinne, bestoônge amper. Vae schaatsje op van di-j houtere lètjes woeë ’n iêzere strip oonger zoot. Noren neûmdje ze di-j en di-j moszje um eur hoeëg schoôn, of zèllefs klûmp(!!) vâstbînge en dao moszje op schaatse. Int begîn waasj mieër schravele as schaatse mer oppendoor kwoomdje d’r toch op vuuroet.  Mer di-j nondedjuuse dînger goonge eeders kieër weer los en dan koszje op eur kni-jje hoêke um ze oppernoets vast te bînge. Dan schoeëte d’r völ scheetgebedjes de helder vreêslocht in. Nondedjiebdjèllo! In di-j houtere schaatse haadje ounog twieë soeërte: Met of zoônger kröl aanne naas. Met di-j zoônger kröl moszje waal speegelglaad ies hebbe, want aster ’n brökske vâstgevroeëre iês op eure wieëg kwoom, gongdje op eûre snuffert. Mét kröl waas det gevaor minder. De schaatsendje paters wiste dao wieëg mej. Kiekt mer oppe foto van Stamtaöfelke 8. Zoeëj de knaal nog oeëts towvreêze?

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.