Met meîne, beschieët d’r zich eine. Dé’s ’n Aod Wieërter gezagdje. “Gae hèjjet mis”, bedooeldje dan. Zoeë esj met völ minse di-jje vraogtj wi-j Doeërus Balt hoot. Dae waas in ziêne-n tiêd, en zieëker nao d’n oeërlog, ’ne wèrreltjbekindje mins in Wieërt. En ziêne achternaam waas neet Balt, waat völ minse meine, mer van Mierlo. Baltem waas ziêne twieëdje vuurnaam, werschiênlik ontstânge as aafkörting van Bartholomeus, doeër ‘ne pestoeër van twieëhoongert jaor gelieëje, dae te lui woor dae naam hieëmaol oet te penne in ziên letiêns duipregister. Hae woor van orrizjien geine Wieërter, want hae waas van Zoerik vandan. Muuëbelmaeker en bieëldjhawwer woor ziêne stiel. Met ’n nog schoeëner woeërt: ebenist. Hae haaj ieërst oppe Bieëkport ziên atteljee, later inne Knaalstraot en nao d’n oeërlog int Paradiêssträötje tieëgenoeëver de Piependje Pörs van de Linge van Lânskes woeë toen Dré en Herman in hoêsheële. Doeërus waas altiêd drök doondje um vör Jan en Allemân de schoeënste muuëbels te make. Puur kunstzinnig hândwêrrek van de boeëveste plânk. Mer good wêrk hieët tiêd vandoon en dan woore de klante wul ’s ongedäöldjig. Dan goofe zien eigeste muuëbels avvâst aanne klânt en koste zien vraw en wichter toês op kisjes zitte. Dé’s dékker gebuuërtj. Zoeëne gooje mins waas det. Eederein kindje ‘m wi-jte oppe foto stieët: stoêfjas aan, piêp inne moond en doemstèk inne tès. Ajje zien wêrkruumdje in det zi-jsträötje binnekwoomtj moszje ieërst de krölle schaafsel, zaegmael en stökke hout aanne kânt schuuve, vuurdejje tegooj doeërkosj. En kaod waasj d’r swîntjers ouch, want d’r gruudje ‘ne boum doeër ’t daak nao boete! Hae hieët ’s oeëts ‘ne kast gemaaktj vör ‘ne direkteur van ’n firma, woeë hae in 12 panieële ’t hieël boorebedriêf oetgebieëldj haaj. Van ploge en zèjje tot ougste en dörse. ’t Waas ’n prachtig stök hândwêrrek wi-jje ’t allewiel neet mieër zeetj. Inne statterkêrrek stieët ‘ne groeëte pepiter met ‘ne adelaar met oetgespreidje vluuëgels. Zoeën dînk woeë ze oonger ’n plechtige hoeëmes met veer Hieëre, ’n zooj kräöls en völ wieërouk-wâllem de missaal van ’n paar kilo op legke. Eìn van di-j vluuëgels waas ram aangevrieëte doeër d’n houtwôrrem dae de wâllem oeëverlaeftj haaj. Doeërus maakdje ‘m nao en ge kosjtj ’t verschîl met ’t orzjinieël neet zeen. Hae transportieëdje zien muuëbels op ’n kèrke met twieë raar achter ziêne fiets. Daomej rieëj hae regelmaotig doeër ’t roeëd stoplîcht aant Julianaplein, tieëgeswoeërdig Langport. “Ich moog det” zagge dan tieëge de wout dae ‘m verbalisieërdje. Mer zoeëne boeëj gluiftj neeme op z’n blaw ouge, dus schrieëf dae’m toch mer op. As ’t presês toês inne bös veel, betaaldje zien vrow de boete, mer zagt dao-oeëver niks tieëge Doeërus, dae dus gewoeën doeërgong met doeër roeëd fietse en zegke dette dao permissie vör haaj.
Doeërus begos later jaore slechter te zeen mèndje hae, dus gonge nao Zjaak Beghijn, d’n oûgendokter. Dae bekieëk Doeërus ’s en bekieëk de brîl van Doeërus ouch ‘s. Pakdje ’n lèpke, vaegdje de brîl zuuver, zat ‘m weer oppe naas van Doeërus en zagt: “Zeëje-n ’t noow baeter?”. “Nondedju, dokter, ich zeentj weer ammaol herstikke good”, zag hae en taffeldje kontênt heivers. En aant indj van dit verhaol nog ’n oetspraok van Zjaak Beghijn: Pruuses es ’n schoeën lând, allein jaomer detter Pruuse woeëne.
© Frits Weerts / Bullseye Publishing
Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
