As de mieëste stumme gelde, dan krieg ich geliêk.Zelfs aanne stamtaofel. Oet de rejaksies di-j ich krieëg op mien opmêrking det ‘ne trappist op ’n terrasje d’n hieëmel es vör mich, gaeve völ laezerkes mich geliêk. Al zeen de mèn en vröllie aanne stamtaofel déks wat gedatieërdj, ze zeentj met mich ins det d’n hieëmel met riêstepap en gouwe lieëpelkes neet opweûgtj tieëge ‘ne trappist op ’t boeteverbliêfske van ’n kefeeke: gewoeën oppe stoep. En wejje waat nog feiner es? Met drej (3 !) trappiste op ’n terras. Azzof ’n îngelke uch oppe tong ……… (wèjjewaal)! Ge moogtj raoje welke terrasje oppe teikenig bedoeldj es. Dae’n echte Trappist haaj Doeërus vanne Trumpert kunne zeen. Doeërus vanne Trumpert waas de beejnaam van ‘ne laevesgeneeter dae versjes, gedichtjes en verhäölkes schrieëf int plat Wieërs, di-j toendertiêd hieël Wieërt gaer loos. Waat mennige Rogstaeker neet wist (of weit) es ,det Doeëres d’r eine waas van de van aodshèr bekindje femiêlie Vercoelen (=Verkuilen op z’n plat?) en ‘ne echte Trappist waas in de Achelse Kloes. ’t Waas femiêlie van de bakker oeëver de statterbrök en van Mia Vercoelen waat jaorelânk de vröllie vertieëgewoeërdigd hieët inne gemeindjraod inne werknemersfraksie. Van z’n eige hoot hae Theodoeëres Vercoelen (1897-1981) en int kloeëster hootte broeder Cornelius. Hae neumdje zich Doeërus vanne Trûmpert umdet ziên groeëtvader ’n kefee haaj oppe Trûmpert aanne Remundsje wieëg. Hae woor toendertiêd, al waasse int kloeëster, zieër begânge met oeës Wieërter spraok. Daovan gaef ich gaer ’n klein stökse as vuurbieëldj oet ’n gedichtje van hem:
“Waat gieët oeës Wieërt toch stêrk vuuroet,weem zal det nog ontkinne? Mer detze knoeëje aanne taal…., waat gaon ze toch beginne? Waat gieët oeës Wieërt toch stêrk vuuroet, op allerlei-js gebeed. Mer detze ’t Wieërs verhollandse, det deut moch toch verdreet.” Det schrieftj dus dieëze Wieërter monnik int begîn of midde van vuuërige ieëw! Toen al! Dit gedicht beslieëtj 10 koeplètjes en es alleszins de moote waerd um gelaeze te waere. Ich wil ’s naogaon of ich dieës verzameling in ’n alik book in ’t allewielse Veldeke-wieërts um kan zette en oppernoets aan de dialektleefhebbers aan kân beeje.
Mer um trök te kaome op dae Trappist: met Doeërus vanne Trumpert zoeëj ich gaer wat naomiddege doeër gebrachtj hebbe op ‘ne kefeestoep, dus met eine orzjinele Trappist inne hang en eine vùùr mich. Want ouch echte Trappiste zeen dao neet vies van. Zeuj motte ‘m toch altiêd preuve vuurdette de duuër oet gieët um verkochtj te ware? Ich zoeëj dao best beej wille hêllepe, mer gaon d’r neet vör int kloeëster.
© Frits Weerts / Bullseye Publishing
Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
