© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 74: Zeen vae braver gewoeër, mèndje? verscheen eerst op MLA Stories.

En dao zeen di-j aojer minse noow zjuust vanaaf, en det gaajt eur. D’r zeen d’r waal beej di-j tössedoeër oppe kleinwichter motte passe uut arigheit of nooëj, en di-j hebbe dus geine tiêd um aanne stamtaofel te kaome zitte. Ich zeen ze langs schuufele en met ’n schael oug nao oeës terrasje kieke. “Kos ich dao mer beej gaon ziite”. Mer hae es deenstdoondj sjefeeur vanne wichterwage en de supervizor luiptj d’r naeve en höltj ‘m van det heiligehuuske aaf. “Dette mich dao nondedju neet beej inne kroeg gieët zitte!” Êrrem minse zeentj, di-j nog zoeëvöl plezeer int laeve zoeëje kunne hebbe en mich verhaole van vreûger koste vertelle, mer ich moog ze neet achter dae mamma-tênk oet sluuëre. Ze hebbe wul ‘s ’n wieërwoeërd: “Mien vraw koeëktj vanaovendj, en as ich te laat toês kom, koeëktj ze nog haarder!” DUS: koeëktj zellef waat uch gaajtj. En ’t alternatief es bitterballe en kieës met sopsuiskes vanne kastelein(se), want dao paajtj hae (of zeûj) uch mej. Hiêmaol neet êrreg asdejje daomej kontênt zeet en kâl zat hetj aanne stamtaofel. Toês zèdje uch dan achter d’n tillevies, slaoptj dao ’n eûrke en gaotj dan nao bed. Waat e laeve!!!!

Ge motj ’t neteûrlik neet tewiêt late kaome, wi-j Bert van Hubèr van Merie vanne Foo gebuuërdje. Dae waas wat doeër de stad gezwâllektj, haaj zien heiligehuuske beej Mam de Borgie aangedaon en schraveldje nao wat glaze beer en zjenaever oppendoôr met de hând langs de birgitinessemoor inne Maasstraot stillekes aan heivers. Mer toen woeëje nog effe beej De Tram nao binne, mer dao pakdje Tinus Broeëds ‘m beej z’ne kraag en bókseboeëm en zagt: “Gaotj mer trök woeë ze uch zaat gevoordj hebbe, heej maakdjae gein spatjes mieër!”, en zat ‘m boete. Dao hieët di-j Groeëtmoel (zoeë neume ze di-j vanne Maasport!) doeër Tinus völ van gelieërdj toenne nog joonk woor, want det waas nog vuurdet beej de kefee van Mam in november 1968 de schaoj oppe knip ging. ’n Groeët verlees vör ’t Wieërter kefee-laeve, woeë ve ’t aanne stamtaofel nog dék met völ emosie oeëver hebbe. Zwêllege in nostalgie zegke ze dao-tieëge, en det es beej ’n pötje beer hieël neet êrreg. Det es gezamelikke memorie.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 72: Gae hèjjet toch ammèr oeëver vreûger? verscheen eerst op MLA Stories.

“Waat gieët oeës Wieërt toch stêrk vuuroet,weem zal det nog ontkinne? Mer detze knoeëje aanne taal…., waat gaon ze toch beginne? Waat gieët oeës Wieërt toch stêrk vuuroet, op allerlei-js gebeed. Mer detze ’t Wieërs verhollandse, det deut moch toch verdreet.” Det schrieftj dus dieëze Wieërter monnik int begîn of midde van vuuërige ieëw! Toen al! Dit gedicht beslieëtj 10 koeplètjes en es alleszins de moote waerd um gelaeze te waere. Ich wil ’s naogaon of ich dieës verzameling in ’n alik book in ’t allewielse Veldeke-wieërts um kan zette en oppernoets aan de dialektleefhebbers aan kân beeje.

Mer um trök te kaome op dae Trappist: met Doeërus vanne Trumpert zoeëj ich gaer wat naomiddege doeër gebrachtj hebbe op ‘ne kefeestoep, dus met eine orzjinele Trappist inne hang en eine vùùr mich. Want ouch echte Trappiste zeen dao neet vies van. Zeuj motte ‘m toch altiêd preuve vuurdette de duuër oet gieët um verkochtj te ware? Ich zoeëj dao best beej wille hêllepe, mer gaon d’r neet vör int kloeëster.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 70: Waat ‘ne Trappist al neet deut! verscheen eerst op MLA Stories.

Ve zeen met z’n 6 miljard en dînke d’r ammaol ângers oeëver waat os te wachte stieët nao d’n doeëd, mer neeme weitj. Ouch aanne stamtaofel zeentj ve d’r neet oeëver ins, mer hawwe os daovör de köp neet in. Mer eeder geluif pretendieërtj detj de ènnigste es dae geliêk hieët en hawdje doeër de ieëwe hieën di-j ângersgeluivinge de hèrses in. Zèllefs allewiel nog. Tachtjig presênt van alle oeërloeëge woore en zeen geluifskwesties. Waat ‘ne onzin eigelik. Geluifdjae in Allah? Nein? Kop aaf! Gluifdjae in Jézeke? Nein? Kop aaf. Boedda es zaligmakendj. Nein? Sodemietertj op! En ouch de Joede oonger aanveuring van Joshua, joôge in Jericho doêzendje jaore gelieëje al ângersgeluivige oeëver de kling. En dan dînkdje wul ‘s: “Wannieër kriegtj de minsheid oeëts verstând?”

Mistrowwe vör ângersgeluivige woeërt os met de paplieëpel ingegaeve. De broêders en zusters zooge leever neet dejje met protestântse of ongeluivige wichter spuuëldje. ’n Gemingdj huwelijk waas ’t èrregste waat dejje verkieërdj kosj doon. Leefdje spuuëldje gein rol, ajje mer ‘t zelleje geluif haadj. Spreuk vanne kêrrek: “Twieë geluive op éín kösse, dao zitj d’n duvel tösse”. En ve spaardje zûlleverpepeer um de heidenwichterkes met gewêldj te duipe um ze beej te kunne schriêve inne ledeliêst van oeës mooder de heilige roomskattelieke kêrk. En di-j kattelieke geistelikke leepe ammaol met lang zwêrte schörte. En waat dînkdje de leste jaore: âl waat kloeëte hieët oonger ‘ne toeëg mojje met ‘t groeëtste mistrowwe betrachte. Det zeen wuuërt van Twan vanne Plak (Stribos) brândwieëroôngerkommandânt in zien jaore, en dan schrief ich nog neet ’s wi-jte-n’t echt zagt. As ich boeëvestaondj vreuger oppe broêderschoeël of ’t Kleezje haaj bewieërdj, waas mich met hel en verdoemenis gedreigdj, zoeëneet al metein vanne schoeël gestamptj. Mer ich laef nog, zoonger bang te hoove zeen det ich boete de gemeinschap waer gezatte. Want det waas vreuger waal zoeë. En det d’n daeke mich geine goojen daag mieër zieët, dao ligk ich neet van wakker. Mer ge kuntj ounog altiêd doon azzof. Schötteri-jje, hermeni-jje, koeëre prizzentieëre zich met hoeëgti-jdaag op ‘t gdróbbel inne kêrk. Det hieët gein kloeëte met geluif te make, want doeër ’t jaor hieën kojje ze dao noeëts tieëge. Sinte Ketrien es dao bedrieëve in. En de Rogstaekers brînge worste nao de nonnekes vör good waer. Gaotj di-j worste astebleef dit jaor trök hale!

© Frits Weerts / Bullseye Publishing

Boek Stamtäöfelke kopen                               
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 64: Wildjae nao d’n hieëmel? verscheen eerst op MLA Stories.

Schötteri-j Sint Job gong op ziêne jaorlikse tieërdaag-met-jaorvergadering gemeinlik nao Mina vanne Kowstal. Gewuuëndje waas dan ouch detter piepkuuëkes gesmausj woeërte. ’t Gebuuërdje op ein van de jaorvergaderinge detter oonger de roondvraog de vraog gesteldj woeërt, of de piepkuukes neet te völ aroma van de boutkiet op zoeëje neeme, want de kuuëke loog d’r nogal dóchtbeej. Hub vanne Bökkem (Bukkems) waas d’r beej en verteldje ’t os oppe stamtaofel.

Zoeën kefee zoeëj mette riggelemênte van allewiel neet mieër kunne en moge bestaon. Woeëje eur koetje oppe groond kosj oettraeje en nao boete mosj um te miechele. Woeë de segare- en segrettewâllem as ’n wôllek inne gelagkamer hong, en ’t roeëk nao zjenaever (vanne mèn) en odeklonje (vanne vröllie). Mer aevezieër doeëdzundj en jaomer det ve dae sfeer neet mieër kunne mejmake. En d’n tiêd es zoeëwiêt gekaome det de kastelein neet mieër kan akkedieëre van allein mer e peelske en ‘ne aoje klaore. Allewiel motte d’r zieëker tieën soeërte beer getaptj waere en ounog wat te aete d’r beej. En weem vanne jong of aojer vröllie hieët nog ’n fleske odeklonje in ziên tasje? As wècht zeendje weit ich nog duvels good det miên mooder mich ‘ne tesneuzik met e paar dröppelkes odeklonje oonger mien naas doedje as ich oôzelèchtig waas. Det haaj ze toezjoer bi-j zich in eur kallevlieske. En ’t heêlep! In det tasje zoot meistens ouch nog ’t österke (det moszje altiêd bi-j uch hebbe!) en ’n rölke paepermûnt vör as de mins wat völ gepreûftj haaj en nao d’n drânk roeëk. Mer dae odeklonje zoeëj dus beej de Kowstâl good van pas zeen gekaome. Aant österke haadje dao minder. Ave Maria gratia plena.

© Frits Weerts / Bullseye Publishing

Boek Stamtäöfelke kopen                               
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 63: Vanne Kowstâl en Odeklonje verscheen eerst op MLA Stories.

Dae verteldje nog wat schoeëns oet dae eksternestudiezaal, waat ichzelf ouch belaefdj heb. Dae zaal zoot herstikke vôl met stadseksterne di-j verplichtj nao de studie moste kaome van 5 wis hallef 8. Umdetter te weinig plaats woor, woeërte de klaslokale d’r naeve ouch vör de studie gebroêktj. Dao zoodje fein boete ’t zicht van de survei-jânt, waat nogal wat muuëgelikhede oeëpendje. De rame van di-j klèskes kieëke oet op de pas aangelagdje Nowwe Mêrrentj en dao loog aanne ângere kânt de bekindje snèkbar “Bon Apetit”. Vae baedje waal eedere daag “Heer, leidt ons niet in bekoring”, mer dao woore ve toch neet tieëgenop gewasse. Hup, de raam oet, vlot oeëver d’n draod geklomme en drieë oppe friet en frikedelle aaf. Oppe trökwieëg de buit effe doeërgaeve aan de studieköp inne klas vuurdejje weer trök d’n draod oeëver klomtj. Smulle mer! As prefesser Nabben deenst haaj, leete zich waal ‘s ontvalle: “Ik ruik frikandellen”, mer det goof niks, want hae waas toen al tezegkes blîndj en zoog neet wi-j vae in ’t geniep zoôte te smauze.

As stadsekstern moszje oeëti-jje boeëdschappe doon vör de interne di-j de kampus neet mochte verlaote. Klasgenoeët Ben Segers en ich ginge oonger ’t spuuëlkerteer altiêd toês effe ’n segret rouke. Oeës mooder raekendje dao-op en haaj de koffie klaor staon. Déks moste ve dan vör d’n ein-of-ângere intern ’n vlaetje of ’n ons kermèls mejbreenge van bakker Zjef van Giel (Nouwen) inne Muuëlestraot. Di-j kloeëdje ve dan mieëstâl doeër ’n döbbeltje oppe pries te zette, want di-j riêke-minse-zuuënkes haaje toch soondesênte zat. Mars waas ouch hieël êrreg in trek, mer dao koste ve niks op verdeene.

Wi-j ve later inne groeëte studiezaal zoôte, kwoom ich ’n tiedje naeve de toen nog onbekindje Joost Prinsen te zitte. Dao most ich ’n pötje pindakieës of sjekladepasta mejbreenge. Dao zoôte dan oonger de studie met ziêne vînger oet te lèkke. Dae vétkanis!

Eíne smieërboel waasj. DAO HAAJ ICH ’N FOTO VAN WILLE HEBBE. Ich gluif neet detter in ziên schrifte ein bladzijde woor di-j neet met înk bekladj woor. Ve schrieëve toen nog ammaol met de vulpen. En allein al ’t völle van zoeë-n pen met rubber zèkske waas al ’n kûnst op zich. Op alle houtere bênk inne klasse en studiezal zoôte dan ouch înkvlèkke di-j d’r noeëts mieër oetgînge. Hieël generasies hebbe aan di-j abstrakte schilderèchtige taferele mejgewêrrektj. Al dan neet bewusj.

© Frits Weerts / Bullseye Publishing

Boek Stamtäöfelke kopen                               
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 60: Verhaole uut de studiezaal verscheen eerst op MLA Stories.

Mer as ich dao oeëts bin, schutj mich tebinne wi-j ‘t dao vreuger towging. Kloeëster Maria-Hart inne Maasstraot waas indertiêd ’n pauselik slot, waat inheel detter streng regels golde vör de nonnekes di-j daobinne laefdje. Ze kwoome allein mer boete um nao d’n tandarts te gaon en te gaon stumme in ‘t aod stadhoês oppe Mêrrentj. En noeëts allein! En met ’n vuuëlke vör de auge. De hieël kloeëstergemeinschap ging in ganzepas doeër ’t daeke-stieëgske naeve de kêrrek op nao ’t stadhoês um te stumme. ’n Köstelik gezicht, woeë ouch nog fotoos van zeen. Mer ze veerdje waal Sinterklaos! Jaorelânk waas Leike de Borgie de Sinterklaos van Vinsênsius en ich waas Zwêrte Piet as ve kedootjes beej de nonnekes mochte brînge. Toen nog zoonger diskriminasie!

Ge woeërtj doeër Drina, de hoêshaodster, binne gelaote in de ontvangkamer. Achter ’n houtere loêk van ‘ne maeter of twieë breid en eine hoeëg, huuërdje ge wat gemummel en vör de rest waasj stil. Tot ’t loêk oeëpe ging!!!!! D’n ieërste kieër det ich det zoog, schrok ich mich kepot. Achter det loêk woore twieë ruuësters van dikke tralies di-j zoeëwiêt uutein stoonge dejje met eur hand de twieëdje tralie neet kosj aanrake. En dao-achter stoong ‘n klocht nonnekes, di-jje dus gein hand kosj gaeve. Ge kosj allein de köpkes met det apaart kèpke ontware. De snuutjes woore amper te oongerschei-je.

En dan begoste di-j zusterkes ’n sinterklaoslidje te kwele waat ich nog noeëts gehuuërdj haaj, mer zieëker van vuur WOI woor. Leike kindje ’n paar nonnekes van naam di-j van Wieërt vandan woore en dao kaldje hae dan plat tieëge. Gegiechel wi-j ’n schoeëklas jong pölle. Mejjèh, Sinterklaos mot toch kedootjes gaeve? Di-j koszje onmuuëgelik doeër di-j tralies gefroemeltj kriêge. Dao haaje ze wat op gevoonge. Oonger ’t traliewêrreke woor ’n schuuflaaj ingebawdj. Ajje di-j nao uch tow troktj, koszje dao ’t kedootje inlegke en trok moôder abdis de laaj nao zich tow en pakdje ’t d’r oet aan d’n ângere kant van ’t Iêzere gerdien. Déks waasj ’n reep sjeklaat of e pèkske speklasie. Of èppelkes en paerkes van marsepein. Niks van ‘n likeurtje, sjerrieke, fleske wiên of zoeëwat. Ve hebbe waal ’s tandebörstels (schoeën verpaktj in sinterklaospepeer) doeër de laaj geschoeëve, want dao haaje ze um gevraogdj. Di-j zusterkes verrèkdje ouch nog vanne êrremooj. AOW bestong toen nog neet. Mer âl waat ze haaje waas gemeinschappelijk bezit, zag moôder abdis. En di-j tandebörstels dan?

© Frits Weerts / Bullseye Publishing

Boek Stamtäöfelke kopen                               
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 59: Lourdesgrotte verscheen eerst op MLA Stories.

En wéjje nog wi-j de schieëresliêp langs kwoom? Vör os as wichter wore ’t rasechte zigeuners en mooder dieëj ‘t achterpörtje oppe knip as di-j inne naober wore. Mes of schieër kwome dék bótter trök as dejje ze aafgegaeve haatj. En ’t zoeëj bést kinne zeen det ein van eur per óngelök ’t kartelmes hieët oetgevoonge. Mer ge woortj waal ‘ne göldje kwiêt en det waas toendertiêd völ gêldj beej e traktemênt van nog gein twieëhóngerd göldjes inne maondj (1946). Mer as wécht stóngdje d’r beej te gape wi-j ze mét eîn beîn dae sliêpsteîn aant drejje brachte. Dao waas zelfs e lidje op: “Terlierelomterla van linksom rechtsom draait mijne steen, door ’t roeren van mijn been, ju, ju, ju, ju”. Det haaje ve oppe kopkiet of beej de broeders gelieërdj. En dan kwoom ins inne waek ounog de schélleboor langs. De vuuërluiper vanne gftbak. D’n aafvâl vanne greuntjes en aerpelschélle woeërte in ‘nen eîmer bewaardj en ins per waek aanne straot gezatte. Korste vanne mik en ejjerschale mochte d’r ouch tösse zitte. Ieërst kwome nog met ’n hóngskèr langs, mer al gaw haaje e paerd mét ’n ker op lochtbendj. Schiênbaar brachtj zat op. Mét daen aafvâl voordje ze thoês ’t paerd en de vêrke, want van kûnstvoor haaje ze indertiêd nog geîne wieët. Awiel ésj verboeëje um gft aanne bieëste te vore en hieët ouch neme mieër e kuuske achter inne schop ligke dae ‘t kuuëke-aafvâl umzétj in spek en kermenaaj. Mer e jaor of tachetjig gelieëje kwoom det nog völ vuuër. Of ânger kleinvieë wi-j ’n geit of ’n zooj knien. Zieëker oppe boetenaaf. Zelfs de kloeësters haaje euren eige vêrkesstâl. En det koszje oeëtti-jje ouch roêke. Oet daen tiêd kinne ve nog mieër minse. Krake Frênske, Bertuske Luis, Merie van Pietje Kamp, de Gekke Nel, Doeërus Bâld, Monne Merteke, d’n Hejgeurt en zoeë kunne ve doeërgaon. Waat wieëte ve nog van di-j stads- en dörpsfigure di-j vreuger edereîn kindje? Meschiens kaome ve d’r nog ’s op trök ajjae mich laotj wieëte waaje d’r nog van wétj.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 31: Minse van toendertiêd verscheen eerst op MLA Stories.

Wi-j later de vröllie nylons gînge drage, veel d’r niks mieër te stoppe. Det koszje neet zelf. As d’r ’n leî-jer in eure nylon kwoom, zootdje inne tröbbels, want dan waas d’n hieële dansaovendj bedôrve, want edereîn kieëk daonao meindje ze dan. Mét det leî-jerke mószje nao de BATA inne Bieëkstraot. Dao zote nejsterkes di-j oonger ’n sterke lâmp en mét e vergroeëtglaas de leî-jer inne kous mét e dräödje tow zote te piele. Later zeen de begienkes inne Maasstraot ouch gestoptj mét stikke.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelkes aflevering 23: Nejje, traochele en stoppe mét stikke… verscheen eerst op MLA Stories.

Hînkele dus. Ge mósj ieërst ’n hînkelvêldj teîkene. Aafgedânkdje heiligebieëldje lieëndje zich dao good vör doeër eure gipse kop te laote gebroêke um hînkelbane te teîkene. Völ van di-j bieëldje haaje zoeëwi-jzoeë al ernstige nekklachte. Det zooje aan de klodder opgedruuëgdje velpon tösse kop en schoûwers.

Mer good, ge teîkendje ’n hînkelvêldj, waat bestóng oet acht, tieën of twelf vakke. Dao zeen de gespesjalisieërde aojer hînkelaarsters ’t neet oeëver eins. Ge mósj dan e vuuërwêrp hînkelendj op ei bein van vak nao vak schuûve. Wieksduuëskes lieëndje zich dao ’t béste vör. Asze te licht wore, dieëdje d’r wat aerd in. ’t Waas ’n echte maegtjesbedoning.
Oeëtti-jje dieëj d’r wul ’s e jungske mej, mer pas later wiszje woeërum.

Oongertösse det eme aant hînkele woor, en det kos wul ’s effe dore vuuërdetj aaf waas, koste de ânger maegtjes d’n tiêd verdriêve mét kaatse. Wi-j mieër bel de maegtjes inne locht prebieërdje te haoje, wi-j meujliker det det waas. Inne vri-j locht of tieëge de moor, det waas íns, de kûnst waas umtj mét zoeëvöl muuëgelik bel te doon. Jonglieëre inne sirk waas d’r niks tieëge. Mer asze d’r eine lete valle en ge stampdje dae as kwaojóng wiêt ewég, dan waasj oeërlog inne straot. ’t Béste waas um de zókke d’r in te zétte en make dejje de klater op góngtj, want di-j ketjes wore neet mis. Di-j kraszje di-j vreîgelers eur smoelwêrk kepot asze de kâns krieëge. Mer jeh, dan mószje ze ouch mer neet zoeë trensenieëre.

Mer de jóng van allewiel kaome neet zoeëvöl mieër boete en doon dieës spuuëlkes dus neet mieër. Hînkele dooje neet inne hoêskamer en kaatseouneet. Zoeë ésj aevezieër mét tawke sprînge. Det kujje neet tösse de glazerekast en eur design knuffelsteulke. Dao mójje vör oppe straot zeen. En det oeës aojers dék zagte det ve nötte straotvêrkes wore, dan waas det mieër ‘nen ieërenaam as e schêldjwoeërd. Zoeë veuldje vae det. En ge woortj as wécht daodoeër noeëts allein. Noow hebbe ze kóntakte via de ‘sociale media’ van achter ‘ne laptop of ‘nen iPhone, mer det és toch neet waat vae oonger kómpeni-j verstoonge.

Beej tawke sprînge dieëje waal wul ’s joonges mej. Dan góngtj d’r um te laote kieke wi-j lang dejje ’t vôl heeltj en waat vör ’n gezwânk (konditie) dejje haatj. Moêlemakeri-j dus. Mer aevezieër neet altiêd zoeë sûmpel. In plaats van op twieë veut te sprînge, koszje ’t mét eîne prebieëre. Of mét twieë tawe di-j tieëge deindânger ín drejdje. D’r wore d’r di-j haaje dao arig de veug van. Ze neumdjen ’t tawkeklètse ajje de tawwe zoeë haard muuëgelik leetj drejje. Soms kloeëtdje ze uch doeër inins de taw strak te trékke. Ajje pech haatj veeldje as jóng óngenaojig op eur kloeëte. En de maegtjes êrges ângers op, ‘n soeërt fruit, zoeë  zagte ze aanne stamtaofel.

Wieksduuëskes gebroêkdje ge neet allein um te hînkele. Mét ‘ne brejje illestiek vanne breefdrieëger en ‘ne halve houtere waskniêper, maakdje ge van eure fiets ’ne brómmer dae kejhaard rateldje. En daomej góngdje as snotkuûk doeër de stad kerre en edereîn gaapdje uch nao.Waat woordje toch gelökkig mét zoeë sûmpel dinger. Laeve de kuit!

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelke aflevering 14: Maegtjes hînkeldje en sproonge tawke verscheen eerst op MLA Stories.

Det waas, en det wieëte ze nog aan oeës stamtaofel, ieërtieds hieël gewoeën. Vröllie droonke neet zoeë völ as di-j mansluj, (woeë és daen tiêd geblieëve?) mer krieëge daovör inne plaats ’n reep sjeklaat. Zieëker wieëte detter vröllie wore di-j ’n groeët kalleflieske bi-j zich haaje um de sjeklaat in op te bêrge. Dan haaje de wichter thoês ouch wat. Dao haaje ze al vantevuuëre oeëver geprakkezieërdj. Inne kefees zooje dan ouch achter d’n tap altiêd ‘n vietrien mét glaze duuër woeë-in de repe sjeklaat en de doeëze sigare stoonge. Want ouch de segare woeërte per stök oeëver d’n toeëg verkochtj. Ki-jje ze nog? Elisabeth Bas, Hofnar (‘nooit fijner gerookt’), Ritmeester, Willem II. En in ’t deurder segmênt, Balmoral en de Heren van Ruysdael. Oeëts waas det hieël gewoeën en allewiel moogtj neet mieër. Vuuërdeîl és dejje deindânger weer kuntj gewaar waere, want vreuger hoonge d’r alezelaeve dikke wôlke inne kroeg. De wichter wore gek op de segarebendjes. Koszje spare en in e schoeëlschrift plekke mët gluton. Dae pleksel kindje ge aanne ruuëk. Beej ti-jje woeërte det hieël verzamelinge in echte dikke albums. D’r wore zelfs kasteleins di-j eur eige snoêtwêrk op zoeë’n segarebendje zatte. “De Mân” vanne Luchtpost haaj zoeë z’n eige segare. Mer hae haaj d’r ouch woeë de foto van z’n vraw op stóng. Of di-j feiner roukdje? Weem zaltj zégke.

Trök nao Jileske. Dao kwoom alderlejs vôlk. Vieëkoupmen (mét deurder segare) di-j dao zake kwome doon en bore di-j eur vêrke, schaop of ’n klócht hinne verkochte. Eîne van eur waas Hârrie van de Vésser (van de Vorst) oet Zwertbrook. Dae kwoom ‘ne kieër dao binne mét ’n pan êrtesop en zagt tieëge Tiny, de kasteleinse: “Zét ’s wat teluurs oppe taofel, want ich heb ’n pan êrtesop mejgebrachtj. Vörs gekoeëktj!” Det woeërt zieër ge-aprisjieërdj, totdet Tiny d’r achter kwoom det eur eige pan sop oet de kuuëke inins pleite woor. En juzzusmiranta, toen woeëre de reube gaar! Det woeëre toendertiêd streek woeë nog arig lang, en verre van noeëj, um gemoonkeldj woeërt. Tiny hieët ‘t os zelf mét pret-uigskes oet de deuk gedaon beej e pötje beer op ’t terras van Dennenoord. Want Jileske és, jaomergenóg, allang tow.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelke aflevering 13: Oeëver sjeklaat, segare en êrtesop verscheen eerst op MLA Stories.

Mer asj zoeëwiêt waas, lepe alle jóng mét ‘ne dikke bóbbel in eur bóks. Gein zörg: inne bóksetès zoot ‘ne dikke peetskernêl dae det veroeërzaakdje. Of ‘ne poepkernêl. ‘ne Poepkernêl haaj de vorm van ‘ne peddekieës en woeërt mét e tawke aan e stekske aangezwieptj. De kûnst waas um ‘m zoeëlang muuëgelik aannegang te haoje. ‘t Gong déks fout as eure kernêl inne richel tösse de plevuûze terecht kwoom.

Peetskernèlle woor völ spannendjer. ‘ne Peetskernêl hieët de vorm van ‘ne spits oetloupendje bôl met oongeraan ’nen iêzere pûnt. Boeëvenop stiktj d’r e klein houtere köpke oet. Hieël sekuur mójje ’t tawke vanaaf de boeëvekânt recht nao oonger leî-je en dan van dao-aaf roond de peets drejje tojje weer bekans boeëve zeetj. ’t Indj haodje good vast en dan goeszje de kernêl van neet te hoeëg métte pûnt oppe groond. Oongertösse trékdje ’t tawke zoeë vlot muuëgelik trök, dan kriegtj de kernêl zien snelheid en blieftje drejje. De kûnst waas eigelik dejje eure kernêl op dae van emenângers goeszje, en det dae dan börszje. Dae de dupe waas, stóng wi-j ‘ne loeëte te koekeloere asze neet al begos te zûmpe. Dao góng eur kwartje soondescênte! Ge kosj uch indékke tieëge di-j schaaj doeër de kernêl boeëvenop te bepântsere mét penaeskes. Ze waere nog spiksplînternow gedrejdj doeër Peter Nouwen oet Ni-jwieërt; ajje nogges wîltj peetse. Kiektj oppe foto.

Aszje aant kernèlle woortj, kosj wul ’s laat waere ieër dejje beej mam woortj. Mer nog later woeërtj ajje aant bude of male woortj. Male wore oet klej gebakke bölkes di-jje beej Geenen’s Bazaar in e buulke vör ‘ne knab kosj koupe. Bude wore dikker, schoeëner en oet glaas. Dus ouch deurder. ’t Spuuël waas um mét ‘ne krómme vînger de buud of maal tieëge ânger aan te ketse en in e kuulke te mikke . Aanne stamtaofel weurtj dudelik detter aevevöl spelregels wore as detter jóng mejdieëje.  Eîn dînk waas zieëker: ajje mét ‘ne buut ‘ne maal good raakdje, blieëf d’r van dae maal allein nog mer ’n huîpke poejer oeëver. Bäöke dus weer. Hieël klein male wore teetjes. Beej det bude zeen d’r hieël wat bóksekni-jje verslieëte want staondjes koszje neet good mikke.

Stiegoeze waas ouch zoeë’n zoeëmerspuuël. Eigelik mószje det mét lieëg konsêrvebösse doon. Kort nao d’n oeërlog wore di-j d’r nog zat, legergreun, vanne Ingelse seldaote. Mer aster gein bösse wore, woeërte d’r e paar kejje opeîn gelagdj en dao mét ânger kejje op gegoesj tojje ze ammaol um haatj. Ajje neet kejje genog haatj, trokdje uch ’n pol graas oet de groond en goeszje ge daomej. Groeëte kâns dejje later oonger de aomzeîksele zootj, mer dao mószje neet oeëver schiêtschoeëtele. Gein înkel modern tablet (des ingels) waat dao tieëgenop kân!

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelke aflevering 12: Peetse, kernèlle, stiegoeze, bude, male verscheen eerst op MLA Stories.

De aojer minse aan oeës stamtaofel kinne dao nog oeëver mejkalle.

Aerpel kochdje beej de boor, en dae brach uch di-j mét paerd en ker tegeliêk vör d’n hieële wîntjer. Los gestortj in de keule, mer vorstvrî-jje, kêlder. In daezelleje kêlder loge ouch de ster-appele en de rebawwe en stoeëfpaere, netjes op houtere schape. Ouch beej de boor ingekochtj vör d’n hieële wîntjer. Ajje d’r van góngtj aete, mószje ieërst de slechtste d’r oet zeuke. ’t Gevolg waas dus dejje d’n hieële wîntjer aangetasj fruit ootj.  En aan de aerpel zote peême. Allewiel légke ze d’n appel al trök asse meîne detter e plekske op zitj.

Ouch greuntjes en fruit kochdje in ’t groeët in um te wecke. Zieëker kni-jboeëne, roeëdmoos en êrte, want di-j lete zich good inmake. Beej völ hoêshaojes waasj dan ouch de gewuuëndje um di-j greuntjes in d’n ougsttiêd per zak van 25 of 30 kilo te koupe. De boor kwoom ze mét paerd en ker aaflevere. As de greuntjes geleverdj woeërte, móste alle gezinslieëje opdrave um mej te kaome hêlpe de boeëne of êrtjes te pelle. Eigelik waas det ’n plezeêrige bedoning, want ’t hieël hoêshaoje zoot gezellig roontelum de taofel de schale van de vruchte te scheî-je. Of roeëdmoos te sni-jje. Mieëstal oonger gezellige kâl oongereîn, mer in hieël erg kattelieke gezinne woeërt oongertösse ’t österke gebaejdj. Det gebuuërdje oeëveriges in völ hoêshaojes edere daâg nao ’t aovendj-aete. Aanne stamtaofel zote d’r woeë ze oonger ’t österke-baeje zelfs gekneeldj aan ‘ne stool zote. Mer de vuuërbaejer kos neet mej de greuntjes zuûver make want dae móst de krölkes van ’t österke doeër zien vinger laote glippe. Stéltj uch vuuër dejje e weesgegroetje tevöl of te weinig zootj baeje! Toen meindje edereîn nog dejje mét prevele van gebedjes d’n hieëmel kosj verdeêne.

Det de kelder vôl weckglaze stóng waas vreuger hieël gewoeën. Di-j haadje haard vandoon vör de wîntjervuuërraod. Beej Paquay of Grein of Boonen kochdje di-j glaze en de beejbehuuërendje stieke. En de weckkieëtel koszje beej de Booreboond koupe.

Mooders en oma’s wore daag lang bieëzig um di-j greuntjes te verwêrke. Wasse, inne glaze doon, zaot d’rbeej, stiek d’rum, déksel d’rop en dan inne kieëtel mét ’n stieëvige klem d’rop. D’r gónge 6 of 8 glaze in ‘ne kieëtel dae tot boeëve de glaze gevöldj woeërt mét water. D’r stoeëk ‘ne thermomaeter in ’t water zoeëdejje de tempereteur inne gate kosj haoje. Oppe kwizzenjaer of op ’n apaart viêfpoeëtsgaaskomfoor woeërt ’t water aanne koeëk gebrachtj. Nao aafkeuling góngtj métte glaze de kêlder in. Mer owieë as tössedoeër ‘ne stiek góng lieëke en d’r locht int glaas kwoom. Dan mószje hals oeëver kop zoeë’n literglaas greuntjes beej ’t aete opmake. Det mószje dus d’n hieële wîntjer inne gate haoje. Zoeë’ne stiek waas dan niks mieër waerd, mer deendje nog good um de zök um ’t boeëvebeîn van vröllie op te haoje. Aszezich deep bókdje, koszje det zeen. En de jóng koste dao ‘ne schoeëne katteprûl mej make en keêzerkes op doêve aafscheete. Dao zeen ouch völ roête mej gesneuveldj.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelke aflevering 10: Ougsttiêd verscheen eerst op MLA Stories.

Det waas vreuger trouwes e schoeën gezicht aszje oppen Iêzere Mân kosj schaatse. D’r wore altiêd broeders van ’t pensjenaat en broen paters vanne Beest róndjes aant drejje of aant kûnstschaatse. In eur habijt! Det wapperdje eur naeve de bein. Schoeën um te bekieke wi-j di-j sierlijk oeëver ’t iês zwieërdje. Begiêne hebbe ve d’r noeëts gezeen. Di-j zoeëj de kap van eur óngepermanêndje haor gewejdj zeen, dînk ich. Of wore ze bang det ve eur tewiêt oonger de schörte kieëke as di-j te hoeëg opwejdje en vae de maagdelike kuûte zoeëje óntware?  “Heer vergeef het hun en leid hen niet in bekoring”. Zoeëwat mótj gewaesj zeen.

Asj gesniedj haaj koszje vreuger op alle spuuëlplaatse en stoepe de jóng zeen sluuëre. Ieërst mószje de snieë aantraeje en dao-op beginne te sluuëre. Met laere zoeële of klûmp! Geîne gummi! Oppendoor haadje dan ’n baan van ’ne maeter of tieën lânk, woeëdejje achtereîn op gingtj sluuëre. Speêgelglaad. Rotjóng gînge dan prebieëre te hakkesluuëre. Ze prebieëerdje dan achter tieëge de hakke van de vuuërmân te tikke en dan veel dae óngenaojig op zien kloeëte, want det ging mét ’n rotvaart. Det waas lache. Mer asze det oppe Broedersschoeël zoge, krieëgdje van broeder Theogêne ’n wats um eur oeëre en mószje vanne spuuëlplaats aaf. Dan woortj gedaon mét lache. De broeders zelf sluuërdje waal altiêd mej, zelfs in eur lang schörte.

En snieëbèl goeze waas ’n sport apaart. Ge mósj d’r waal geîn iês tösse doon, waat sómmige voelike dieëje, want dan kosj haard aankaome en pien doon. ’t Feinste woor aster ouch maegtjes beej wore, di-jje dan wat snieë achter de kraag van eur waemeske doedje en dan kaakdje ze of ze gekaeldj woeërte. Lôl mân !!!

Boezjieëre: [email protected]

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelke aflevering 8: Wîntjer verscheen eerst op MLA Stories.

Mer soondes mochdje mét de groeëte mej nao de hoeëmes. Aanne stamtaofel weurtj dao ‘t volgendje oeëver vertéldj: As de més 1 of 2 menute aannegang woor, kwoom d’r stieëvast ’n sjieke dame binnegeloupe di-j op eur hoeëghakke-hekskes trip-trap-trip-trap tot hieëlemaol aan de vuuërste bênk leep en dao op de doeër eur gepachdje plaats ging zitte. Det veel op! Mer det waas neet alles. As de gewieëze kräölkes roondkwome métte kollekteschaol, dan pakdje ze hieël demonstratief ’n pepeêre tientje oet eur buuërske en leet det, oonger ’t oug van ’t hieël kêrkvôlk, good zichtbaar in de schaol valle. Azzof ze woeëj zégke: “Minse, zeejae ouch waal waat ’n good mins ich bin!” Dao kân oeëze JJ (Jubel Jos) nog wat van lieëre want dae kân d’r ouch wat van!

Aevezieër wore di-j wichtermésse neet zoeë gek. Ge kosj d’r hejop mejzînge en det wêrkdje euforisch. Ouch ‘t gregoriaans és in ’t gehuuëge bliêve plekke wi-j sómmige evergreens en stiegtj nog oeëtti-jje op oet de vergaetelheid. Mer zînge inne kêrk és vör de mieëste stamgaste vergânge tiêd. Ze zînge sóms waal nog, mer det blieftj bepêrktj tot de kefee. Eîne vanne gaste zagt: ’t geluif és as ‘ne pepeêre buul. Ajje d’r tevöl indoetj, schuuërtje en luîptj d’r alles oet. En zoeë ésj gegânge. Van eur veerdje tot achtieëndje laevesjaor stóngdje oonger de gewiedje klöppel van men en vrawwe in lang zwerte habiête. En zoodje op ’n ânger schoeël, dan stóng vuuër de naam altiêd RK en woor de geistelikheid dik vertieëgewoeërdigdj int besteur um de kattelieke moraal mét hând en tând te handhave. Mer ’t waas neet ângers en ge wisj neet baeter. Later, oonger deensttiêd, kwoomdje d’r achter detter minse wore di-j d’r ângers oeëver dachte en det blieëk dan geîn verkieërdj vôlk te zeen. Mer as vae oppe schoeël mét ’n prottestânts jungske spuuëldje, woeërte ve d’r op aangekieëke.

Schoeën wore ouch de presessies. Inne stad en op alle dörpe trok roontelum Sakremêntsdaâg de groeëte presessie. Mét alle geledinge van de bevôlking in eur paosbéste pak of klédje. De fanfaar of hermeni-j, de vrawweboond, de wielerklub,  maegtjes as bruûdjes, ’t kêrkkoeër, ‘t knapekoeër, ’t maagdekoeër (!), de Vincentiusvereîniging, ’t Marialegioen, de schötters kómplieët mét kuuëning, vuuërbaejers en naobaejers, trokke doeër de straote di-j verseerdj wore mét bloomtapijte en inne duuëre vanne hoêzer stónge âltäörkes mét blome en kerse. Vuuëraafgegânge doeër flambouwdrieëgers volgdje oonger ’ne baldakein (d’n hieëmel !) ’t Allerheiligste en alle kiekers aanne kânt vele op eur kni-jje. Jaore later hieët oeëzen daeke van der Valk det nog ’s in ieëre wille herstélle. De stedelike hermeni-j Sint Antoeënius leep toen (al waasj noeëj) ouch mej. Vuuëraafgegânge doeër ’n ruiteri-j. Oongerwieëges lete di-j paerd mej-en-dan eur kuuëtele valle en de muzikânte, mét volle aandacht vör de meziek, trooje dao dan in. Ich leep d’r beej en heb nog noeëts in zoeë korte tiêd zoeëvöl scheetgebedjes de locht in huuëre gaon. Ze wore neet gecenzurieërdj, mer de naam God kwoom d’r dék in vuuër.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelke aflevering 7: Zalig zeen zeuj, di-j… verscheen eerst op MLA Stories.

D’r waas ‘s ‘ne vader dae vroog aan daeke Souren offe beej zien gezin int damesbad moch bliêve. D’n daeke leep roeëd aan en stâmpdje ‘m ongevieër nao boete; wi-j dette d’r in godshieërenaam  beej kwoom det te dörve vraoge. Hae és noeëts mieër gaon zwumme. Waat ‘ne bekroompe tiêd!

Mer aevegood waasj fein zwumme dao, want dao woor ’n zândstrând waat zeutjes aafleep in ’t water en asj zoeë deep waas det ’t water bienao aan eur schoûwerkes kwoom, waas d’r ’n aafscheî-jing mét houtere päölkes mét hinnedraod woeë dejje neet achter mochtj kaome van badmeister Bèr Ramaekers.  Dao hebbe de mieëste van oeëze laeftiêd zwumme gelieërdj zoonger lés te kriêge. Ge kieëktj de kûnst aaf van di-j ’t al koste. En di-j gove uch ouch gooje raod wi-jje mét eur erm en bein mósj slaon. Eigelik gingtj vanzelf. D’r zeen d’r zat di-j eur laeve lânk gezwómme hebbe zoonger oeëts de proof aafgelagdj te hebbe en geîn zwumdiploma boeëve eur béd hebbe hânge. Mer ze zwumme as vésse!  De duiktoeëres wore gebawdj van houtere päöl en stónge zoeë’ne maeter of tachetjig boete ’t aafgepaoldj zwumbad.Dao koste dus allein vollieërdje zwummers nao tow. D’n duiktoeëre van ’t hieërebad koszje van de lange en de korte kânt bereike umdette inne lînkerhook vannen Iêzere Mân loog, van Dennenoord oet gezeen. D’r wore kleîdhökskes van grene plênk di-j van boete greun gebeitsj wore en van binne wit gekâlktj. Eur kleî-jer hóngdje op ’n houtere kapstökske en goofdje aaf inne bewaarruumdje. Op ’t zândstrând langs ’t water mochdje spuuële wi-jje woeëtj. Koêle grave en vôl water schöppe en dan doeër ’n bieëkske trök laote loupe innen Iêzere Mân, waas ’n fein bieëzigheid. Oppe foto zeeje de schriêver in 1948 dao drök mej doondje. Det waas nog aan de damesbadkânt. Oppen achtergroond zeeje de kleîdhökskes en bewaarruumdje. Oppe ânger foto zeeje dudelik de aafscheî-jing tösse ‘t deep en óndeep gedéldje. In daen tiêd koszje ’n abonnemênt vör d’n hieële zoeëmer fl 7,50. En dan koszje zoeë dék zwumme ajje woeëtj. Inne verkânsie hóngdje dao d’n hieëlen daâg roond en haadje de boeëterhamme en ‘n fles (aanling)limmenaat bi-j uch. D’r knarszje waal altiêd aerd tösse eur tang ajje ootj.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelke aflevering 6: Zwumme in d’n Iêzere Mân verscheen eerst op MLA Stories.

In ’t kleezje zote oeës bevrijders, de Ingelse seldaote. Dao haaje vae good kontakt mej, want vae drieëve iêverig ruuëlhândel doeër de kamerraam mét merketóns oet eige hoeëf in ruuël vör “tjoklat” en “cigarettes”. D’r waas ‘ne drökke pendeldeenst ónstânge tösse ’t kleezje en kefee De Wacht en di-j seldaote móste dus langs oeëze raam kaome.

Ich mocht neet inne kefee kaome van mien vader, want ich dînk det mien uuërkes nog te joonk wore vör de seldaotekâl. Ich bin in daen tiêd waal binne gewaesj um Bet en Zjaak Van Lierop (de Zate Bóks) te fillesetieëre mét eur goûwe broêleft op 18 juni 1945. De Muuëlestraot waas toen verseerdj mét dennebuimkes mét pepeere ruuëskes vör de presessie oppe kêrk aan. Det kân tieëgeswoeërdig neet mieër, want nao de brând en ’t dao-op volgendj aafbraeke van ’t kleezje hebbe ze oet historisch onbenûl de hieël straot mer nao de kloeëte gehôlpe. Wég és de prachtige gaevel van de Knep (appetieëk Kneepkens), ’t hoês van Frits Snijders dae in wiên dieëj. Wég és kefee van de Kerkhof annex wasseri-j, en ouch bakkeri-j Nouwen (Sjef van Giel). Schoeën gaevelkes, zoeë-wi-j  det van Schroête-Koeëb (baejdje de pien vanne rimmetiek wég) en Munnecom (in sportartikele) en slagter Gruythuysen. En ’t historische Muntgebouw hebbe ze zoeë ingebouwdj dejje d’r bekans niks mieër van zeetj. Wég és ouch ’t lieëg huuske (hotel Stootjehoofdniet) van Mies (de Kat) van Dooren, de muzikale kapper. Dae zoot soeëmerssaoves mét oeëpe rame in zien schaersalon op zien klarinet te rippetieëre; de hieël straot kos mejgeneete. Allewiel neume ze zoeëwat geluidsoverlast, mer toen vóngdje det neet lastig en hieël gewoeën.

’t Waas ’n gezellige straot mét nogal wat jónger vôlk, woeë oonger ângere di-j van Linnartz (van ’t Kûntje) volop aan beejdroge. Gelökkig stieët det schoeën pând d’r waal nog.

In oeës hoês haaje ze later de meziekschoeël oongergebrachtj en dao hebbe verschei-je gaste van oeës stamtaofel eur muzikaal groondbeginsele mejgekrieëge.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelke aflevering 5: Woeë es di-j straot geblieëve? verscheen eerst op MLA Stories.

Ge haatj verschei-je soeërte koeële. De gewoeëne hoêsbrând neumdje ze nuuëtjes en di-j haadje inne formate 0 tot 6. Nuuëtjes-4 waas de mieëst gebroêkdje en moot tösse de 8 en 15 mm en bevatdje minder gaas as ânger soeërte koeële.

Ouch wore d’r nog de ejjerkoeële en de brikette. Di-j wore mét smieër samegepörsj oet koeëlegruûs en wore vör ânger oeëves geschiktj. En dan haadje ouch nog slâmp. Det waas tuûg! Det spul bestóng oet naat koeëlegruûs van kleiner as ‘ne halve millimaeter en plekdje as de zikdje. Ich weît zelf nog det bakker Sjef van Giel (Nouwen) beej os tieëgenoeëver inne Muuëlestraot, zienen oeëve stoeëkdje mét slâmp. Umtreentj ins inne 14 daag kiepdje de koeëleboor zoeë’n doêzendj kilo vuuër de bakkeri-j oppe straot en dan kos Zjef mét schöp en kroekèr ’t spul nao binne vare. En owieë asj raengeldje! Dan begos d’n toter te driêve. Ajje dan dao doeërhaer fietszje, haadje zwerte strepe oppe straot vanne singel totte mêrrentj.

Ieërtj zoeëwiêt woor, haaj de koeëleboor al ‘ne treinwagon van 25 tón métte schöp gelosj in porties van 1000 kilo op zien paerskér of vrachtwagentje. En dan aan hoês aaflevere awweer métte schöp. As de slâmp te naat waas, koszje ‘m neet schöppe en mószje ‘m laote oetsiêpele. Det waas schaajlik, want ge haatj det weggesiêpeldj water vör slâmppriês vanne koeëlemien gekochtj. Ich heb jaomergenóg gein foto van ‘ne bêrg slâmp.

In miene jóngen tiêd stoeëkdje ge int najaor de haard aan mét wat brândhout, dieëtj dao nuuëtjes-4 op en leetj ‘m aanne gang trékke. Oonger inne stoeëf zoot ’n löchtschuuf di-jje oeëpe en tow kosj zétte. Al naovenânt dejje di-j schuuf instéldje, bördje d’n haard (of de kwizzenjaer) haarder of zaochter. Saoves vuuër ’t nao béd gaon, völdje mooder mét de kit de koeële beej en zat de schuuf klein, zoeëdet d’r mer e bitje veur in blieëf. Smêrges um zieëven oor woeërt edereîn wakker as oeës mooder de schuuf wi-jjer oeëpe zat en mét ’t raokeliêzer de asse oonger de koeële oetraokeldje. Dan begos d’n haard weer hejop te börre en woeërtj wêrm inne kamer. Det waas ’n trökkaomendj ritueel en huuërdje beej ’t ritme van d’n daâg. Mer inne wîntjer haadje in eur béd waal ’n werm kroêk noeëdig!

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelke aflevering 4: Koeële en slâmp stoeëke verscheen eerst op MLA Stories.

‘ne Gevânge vés weurtj aan ’n stamtaofel ederskieër groeëter. Gaotj mer ’s tösse ’n bups véssers zitte, dan huuërdje det ze kêrp gevânge hebbe innen Iêzere Mân, dae zich dao âmper in kân drejje. En gae gluiftj det!

Mie groeëtvader, Dôlve Fried, geboeërtig oet Meijel en opgegruudj inne Pieël, waas in zien jóng jaore ouch ‘ne verwoedje vésser, mer dan op ’n spesjaal meneer. Hae woor zieër bedrieëve in ’t vésse métte stölpmang. En ’n stölpmang waas ’n rónde van reet of scheêne gevlochte, taps towloupendje mang, di-j van oonger en van boeëve oeëpe woor. D’n hâls van boeëve waas zoeë smaal dejje d’r zjuust ’n hând in kosj staeke. Van oonger waasse breîd.

Ge stapdje, mét of zoonger stevele -det weît ich neet- inne bieëk. Dao meurdje ge mét eur veut de drabbes op, zoeëdet ‘t water troebel woeërt. Dan zatdje de stölpmang mét d’n oeëpe brejje kânt nao oonger oppe boeëm vanne bieëk. De vés zwóm dan nao boeëve nao óngemeurdj water en dan koszje ‘m van boeëve doeër de smale hâls mét eur hang pakke en oppe kânt goeze. Waal wiêt zat, ângers spróngen uch trök. Inne pieëlvaarte zote völ rutse. Dao weurtj zelfs in ’n vastelaovendslidje oeëver gezoonge. Oeëver ’n ruts inne Noeërdervaart. Mer ‘t schientj detter ouch paoling te prikke woor. Dae hultj zich gaer op inne sliêk.

Op beejgaondje foto oet 1931 staon ‘ne groep minse di-j zoeë te zeen d’r eine aant drînke zeen oppe goojen aafluîp van ’n vésparti-j. Ich heb geî verstând van vésse en weît dus neet of de vangst woeë ze mej proonke rutse zeen of meschiens kêrp. Waal weît ich det dae groeëte mins lînksboeëve Dôlve Fried és, mie groeëtvader. Midden aanne taofel zitj d’n “Aojen hieër Zjang” (Van de Venne, oprichter vanne maelmuuële) en rechs “Bolle Jan” (Hendriks van de óntginninge inne Hej en op Doospel). De plaats van dieës gebuuërtenis kân twieëjerlej zeen. Zeen de vésse rutse, dan zaltj aanne Noordhoeve op Doospel zeen, woeë Bolle Jan zien óntginninge haaj en dus pieëlknaelkes wore. Mer asj kêrp és, kântj ouch aan Villa Molenveld naeve de maelmuuële zeen, woeëdet Zjang van de Venne woeëndje. Achter dae villa loog indertiêd ‘ne groeëte wi-jjer woeëdet ze gevânge kêrp vieërtieën daag in zuûver water lete zwumme, um de moddersmaak d’r vanaaf te hale. Kêrp meurtj altiêd. Ich heb kort nao d’n oeërlog nog gezeen det dao ’n nét oeëver gespanne waas. Neet um te vuuërkaome det eme ‘ne kêrp zoeëj sjoepe, mer det di-j vésse neet oet de wi-jjer zoeëje sprînge. Kêrp haodje neet gemaekelik gevânge. Det wieëte minse di-j vreuger op kêrp gónge vésse en dae dan thoês inne badkuûp zatte um de sliêksmaak d’r oet te hale. Mieëstâl voonge ze dan later de vés naeve de kuûp trök.  Met de moel oeëp en toch geînen aom. En dan waasse nog neet te knoûze, want hae smaakdje nog nao d’n toter.

© Frits Weerts / Bullseye Publishing

Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Het bericht Stamtäöfelke aflevering 2: De véssers verscheen eerst op MLA Stories.