’n Paar mansluj di-j vanne wîntjer wi-jtj gevroeëre haaj, op wieëg nao oeës stamtaofel, naeve de kestieëlsgraaf op lepe, woor wat ópgevalle. D’r loog iês oppe graaf en det waas maagdelik glaad. Gein scheif vastgevroeëre schol te zeen. Det kwoom vreuger neet vuuër. Ónmuuëgelik! De jóng van vreuger (ouch di-j vanne stamtaofel) begoste, drek asj gevroeëre haaj te prebieëre wi-j stêrk ’t iês waas, en oftj uch al kost drage. Kejhaard stâmpe op ’t iês mét nog eîne voot oppe wâl, tot ’t iês broeëk. Tuste neumdje vae det. En asj lökdje haadje meteîn nate sieke. En ajje d’r doeër zakdje, koszje ri-jjerendj op hoês aan taffele, uch beej de poompsteîn aafdruuëge en druuëg liêvendj aan doon. Det tuste zoogdje ouch aanne groeëte en kleine Iêzere Mân. Roontelum woeërt vreuger ’t iês zoeë lang getusj totj stêrk zat waas en ge d’r op kosj gaon schaatse of sluuëre. En as d’n doeëj introoj, brook ’t iês en vörâl inne bieëkskes kwome dan scholle los. De kûnst waas dan um van schol nao schol te sprînge. “Schölke traeje”, neumdje vae det. Dit jaor waas dao niks van te zeen en woortj ónbeschadigd glaad. Doon di-j jóng det allewiel neet mieër of kaome ze neet mieër oppe locht? Vae-zelf mét oeës aoj knuuëk zoeëje ’t gaer nog ’s prebieëre, mer oeës verstând zieët det ve det baeter kunne laote. De zörgköste zeen al hoeëg zat, dus bliêve ve aanne stamtaofel beej Dennenoord zitte um d’r allein mer oeëver te kalle en oeëver d’n Iêzere Mân te kieke.
Det waas vreuger trouwes e schoeën gezicht aszje oppen Iêzere Mân kosj schaatse. D’r wore altiêd broeders van ’t pensjenaat en broen paters vanne Beest róndjes aant drejje of aant kûnstschaatse. In eur habijt! Det wapperdje eur naeve de bein. Schoeën um te bekieke wi-j di-j sierlijk oeëver ’t iês zwieërdje. Begiêne hebbe ve d’r noeëts gezeen. Di-j zoeëj de kap van eur óngepermanêndje haor gewejdj zeen, dînk ich. Of wore ze bang det ve eur tewiêt oonger de schörte kieëke as di-j te hoeëg opwejdje en vae de maagdelike kuûte zoeëje óntware? “Heer vergeef het hun en leid hen niet in bekoring”. Zoeëwat mótj gewaesj zeen.
Asj gesniedj haaj koszje vreuger op alle spuuëlplaatse en stoepe de jóng zeen sluuëre. Ieërst mószje de snieë aantraeje en dao-op beginne te sluuëre. Met laere zoeële of klûmp! Geîne gummi! Oppendoor haadje dan ’n baan van ’ne maeter of tieën lânk, woeëdejje achtereîn op gingtj sluuëre. Speêgelglaad. Rotjóng gînge dan prebieëre te hakkesluuëre. Ze prebieëerdje dan achter tieëge de hakke van de vuuërmân te tikke en dan veel dae óngenaojig op zien kloeëte, want det ging mét ’n rotvaart. Det waas lache. Mer asze det oppe Broedersschoeël zoge, krieëgdje van broeder Theogêne ’n wats um eur oeëre en mószje vanne spuuëlplaats aaf. Dan woortj gedaon mét lache. De broeders zelf sluuërdje waal altiêd mej, zelfs in eur lang schörte.
En snieëbèl goeze waas ’n sport apaart. Ge mósj d’r waal geîn iês tösse doon, waat sómmige voelike dieëje, want dan kosj haard aankaome en pien doon. ’t Feinste woor aster ouch maegtjes beej wore, di-jje dan wat snieë achter de kraag van eur waemeske doedje en dan kaakdje ze of ze gekaeldj woeërte. Lôl mân !!!
Boezjieëre: [email protected]
© Frits Weerts / Bullseye Publishing
Boek Stamtäöfelke kopen
‘t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
