Stamtäöfelke aflevering 5: Woeë es di-j straot geblieëve?

Foto: Praalwage en gebómbardieërdj hoês. © Frits Weerts

De stamtaofel haaj zich nieërgezatte beej de aoj kefee van Van Doeëre (Dooren)
-de Hermeni-j- inne Muuëlestraot di-j allewiel Muntpromenade hétj. De gaste kieëke doeër de glaas nao boete en vaneîges kwome de herinneringe opzétte. Oppe plaats vanne lieëgstaondje etalaasj van V&D (2015) zoge ve in oeës gedachte nog ’t aod pând vanne femiêlie van der Velden det in oktoeëber ’44, kort nao de bevrijding, doeër ’n verdwaaldje bóm mét eine slaag in puin kwoom te ligke. Nondedjou, det waas ‘ne slaag! Vae woeëndje toen ’n fieftig maeter wi-jjer aannen ângere kânt van ’t kleezje (Bisschoppelijk College) en wore van daen oeërlog niks gewindj. Waal de vluchtelinge oet Blieërik (Blerick) di-j beej os in hoês oongergebrachtj wore. Di-j haaje al bómbardemênte mejgemaaktj, en van schrik leet de mooder van di-j femiêlie (Van Wing waas de naam) ’t hieël koffieserviês woeë ze mej nao de kuuëke op wieëg waas, oet eur hang valle. D’r waas niks mieër van alik, net zoeë mîn as van ’t getroffe hoês. Oppe foto zeeje de ruïne mét d’rvuuër ‘ne praalwage vanne bevrijdingsoptocht dae kort daonao gehaoje és. Mien mooder stieët daobeej werschiênlik te dînke waat d’r gebuuërdj zooj zeen as di-j bóm e bitje wieter gevalle zoeëj zeen. Oppe wage zitte nog twieë zösterkes van mich. Oppe plek vanne bouwvâl hebbe ze later de doeërgânk nao de van Berlostraot gemaaktj en det waas ’t ontstaon van de Nowwe Mêrrentj.

In ’t kleezje zote oeës bevrijders, de Ingelse seldaote. Dao haaje vae good kontakt mej, want vae drieëve iêverig ruuëlhândel doeër de kamerraam mét merketóns oet eige hoeëf in ruuël vör “tjoklat” en “cigarettes”. D’r waas ‘ne drökke pendeldeenst ónstânge tösse ’t kleezje en kefee De Wacht en di-j seldaote móste dus langs oeëze raam kaome.

Ich mocht neet inne kefee kaome van mien vader, want ich dînk det mien uuërkes nog te joonk wore vör de seldaotekâl. Ich bin in daen tiêd waal binne gewaesj um Bet en Zjaak Van Lierop (de Zate Bóks) te fillesetieëre mét eur goûwe broêleft op 18 juni 1945. De Muuëlestraot waas toen verseerdj mét dennebuimkes mét pepeere ruuëskes vör de presessie oppe kêrk aan. Det kân tieëgeswoeërdig neet mieër, want nao de brând en ’t dao-op volgendj aafbraeke van ’t kleezje hebbe ze oet historisch onbenûl de hieël straot mer nao de kloeëte gehôlpe. Wég és de prachtige gaevel van de Knep (appetieëk Kneepkens), ’t hoês van Frits Snijders dae in wiên dieëj. Wég és kefee van de Kerkhof annex wasseri-j, en ouch bakkeri-j Nouwen (Sjef van Giel). Schoeën gaevelkes, zoeë-wi-j  det van Schroête-Koeëb (baejdje de pien vanne rimmetiek wég) en Munnecom (in sportartikele) en slagter Gruythuysen. En ’t historische Muntgebouw hebbe ze zoeë ingebouwdj dejje d’r bekans niks mieër van zeetj. Wég és ouch ’t lieëg huuske (hotel Stootjehoofdniet) van Mies (de Kat) van Dooren, de muzikale kapper. Dae zoot soeëmerssaoves mét oeëpe rame in zien schaersalon op zien klarinet te rippetieëre; de hieël straot kos mejgeneete. Allewiel neume ze zoeëwat geluidsoverlast, mer toen vóngdje det neet lastig en hieël gewoeën.

’t Waas ’n gezellige straot mét nogal wat jónger vôlk, woeë oonger ângere di-j van Linnartz (van ’t Kûntje) volop aan beejdroge. Gelökkig stieët det schoeën pând d’r waal nog.

In oeës hoês haaje ze later de meziekschoeël oongergebrachtj en dao hebbe verschei-je gaste van oeës stamtaofel eur muzikaal groondbeginsele mejgekrieëge.

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.

Vorig artikelWeekend van 9 en 10 juni ‘Cuypersweekend en fietsexcursie ‘het Duitse lijntje’
Volgend artikelOmleiding voor verkeer tussen Neerpelt en Hamont-Achel